Монгол улсын дөрвөн иргэн хоригийг үл хайхран, амны хаалт хилээр нэвтрүүлэхийг завдан саатуулагдсан талаар Казахстаны Павлодар мужийн Улсын орлогын департамент мэдэгдсэнийг Total.kz дамжууллаа. 

Казахстаны Ерөнхий сайдын 2020 оны нэгдүгээр сарын 29-ний өдрийн захирамж болон шинэ төрлийн титэм виусийн халдварын тархалттай холбоотойгоор тус улсаас шүүгчтэй амны хаалт, хамгаалалтын нүдний шил, тахлаас хамгаалах хувцас, нэг удаагийн хамгаалалтын хувцас, амны хаалт, халат болон бээлийг гаргахыг хориглосон.

Энэ хориг тавигдсанаас хойш хууль бусаар амны хаалт их хэмжээгээр нэвтрүүлэх оролдлого дөрвөн удаа гарсан бөгөөд эдгээрийн дунд Монгол улсын иргэд байжээ.

"Монгол улс руу барааны баримт бичиг, зөвшөөрлийн баримт бичиггүйгээр 8000 амны хаалт нэвтрүүлэхээр завдсаныг таслан зогсоосон. Хууль бусаар амны хаалт нэвтрүүлэхийг завдсан этгээдүүд нь Монгол улсын иргэд байсан бөгөөд 27 настай хоёр, 32-33 настай хоёр иргэн байсан" гэж Улсын орлогын департамент мэдээлжээ.

Энд дуулгахад, дэлхий даяар титэм вирусийн халдвар тархсан энэ нөхцөлд амны хаалт, хамгаалалтын хэрэгслүүдийн эрэлт эрс өссөн бөгөөд үүнтэй холбоотойгоор ОХУ ч мөн энэ төрлийн бүтээгдэхүүнийг их хэмжээгээр хилээр гаргахыг хориглосон юм. 

Харин энэ хоригийг үл хайхран манай улсын иргэд Орос-Монголын хилээр нэвтрүүлэхийг завдсан хэрэг өмнө нь бүртгэгдэж байв. Хориотой бараа бүтээгдэхүүнийг журам үл хайхран хилээр нууж гаргахыг завдвал тухайн бүтээгдэхүүнийг улсын орлого болгохын дээр захиргааны зөрчлийн хэрэг үүсгэн, мөнгөн торгууль ноогдуулах зэрэг шийтгэл ноогдуулдагийг иргэддээ анхааруулж байна.

Амны хаалт хууль бусаар хилээр нэвтрүүлэхийг завдсан Монголын иргэнийг саатуулжээ

Г.Бямбасүрэн