Нийслэлийн прокурорын газраас Ерөнхий сайд асан М.Энхсайханы шүүх хурал хойшилсон даруйд хувийн баталгаа гаргуулах таслан сэргийлэх арга хэмжээг өөрчилж, дараагийн шүүх хурал хүртэл цагдан хорих, таслан сэргийлэх арга хэмжээ авсан талаар мэдээлэл хийлээ.
Прокурорын газрын хяналтын прокурор Д.Эрдэнэсувд:
-Хуульд заасны дагуу иргэн үг хэлэх, хэвлэн нийтлэх эрх чөлөө нь нээлттэй. Яллагдагч мөн эрүүгийн хянан шийдвэрлэх тухай хуулийн 7.9-д заасны дагуу тодорхой үүргийг хүлээсэн байдаг. Яллагдагчийн хувьд мөрдөн байцаах ажил дууссаны дараа хавтаст хэрэгтэй танилцаж эрхээ эдлээд, нотлох баримтуудыг хуулбарлан авсан. Түүний гэм буруугүй асуудлыг эцэслэн шийдвэрлээгүй байхад тухайн нотлох баримт болон гэрчүүдийн мэдээлэл, тодорхой шийдвэрүүдийг хэвлэл мэдээллийн хэрэгслээр тарааж, мөрдөн байцаалтын ажил задруулахгүй байх баталгаа авч, гарын үсэг зурсан хүний хувьд ийм үйлдэл хийсэнд нь шүүхээс цагдан хорих шийдвэр гаргасан. Прокурорын зүгээс шүүх хуралдааны явцад мөрдөн байцаах ажлын нууц задруулсан, шүүхэд нөлөөлөх гэсэн байдалд нь хууль зүйн асуудлыг хөндөж, энэ асуудалд шүүхээс дүгнэлт хийж цагдан хорих арга хэмжээг авсан байна.
Шүүх хуралдаан дээр өмгөөлөгчийн хүсэлт гаргасан гэрчүүд ирээгүй гэсэн үндэслэлээр шүүх хурал хойшлогдсон байна гэж мэдээллээ. Тэрбээр мэдээлэл хийсний дараа сэтгүүлчдийн асуултад хариулав.
-Сайд асан М.Энхсайханыг цагдан хорихдоо эрүүдэн шүүсэн байж болзошгүй гэсэн мэдээллүүд гарч байна?
-Нийслэлийн прокурорын газраас хорих 461-ээр ангид хоригдож байгаа яллагдагч нартай уулзаж санал хүсэлтийг нь сонсдог. Энэ сарын 24-ний өдөр прокурорын газраас М.Энхсайхантай уулзсан. Уулзахад түүнээс ямар нэг санал хүсэлт байхгүй, хоолоо сайн идэж байгаа гэсэн. Тиймээс энэ бол ташаа мэдээлэл юм .
-Иргэн Х.Бат-Ялалт өлсгөлөн зарлаж байгаад хорих ангиас суллагдлаа?
-Х.Бат-Ялалт иргэн Эрдэнэчимэгээс гаргасан гомдлын дагуу 2019 оны дөрвөдүгээр сард хэрэг бүртгэл нээж удаа дараа дуудсан боловч ирээгүй. Тиймээс түүний таслан сэргийлэх арга хэмжээг хүндрүүлэхээр прокуророос санал тавьж шүүхээс цагдан хорих, таслан сэргийлэх арга хэмжээг авсан. Сая урьдчилсан хэлэлцүүлэг болж Х.Бат-Ялалт прокурор, мөрдөгчийн дуудсан цагт саадгүй ирэх хүсэлт гаргасан учраас түүний таслан сэргийлэх арга хэмжээг өөрчилсөн.
Г.Мичидмаа