Шинэ Зеландад хоёр долоо хоногийн туршид шинээр нэг ч халдвар илрээгүй бөгөөд коронавирусийн халдвар авсан сүүлчийн өвчтөн эдгэрсэн гэж тус улсын Эрүүл мэндийн яам мэдэгдлээ. 

Тодруулбал, Оклендэд эмч нарын хяналтанд байсан, коронавирусийн халдвартай сүүлчийн өвчтөн бүрэн эдгэрсэн гэж эмч нар өнгөрсөн амралтын өдөр дүгнэсэн байна. Шинэ Зеландын Ерөнхий эрүүл ахуйч эмчийн мэдэгдсэнээр халдварын анхны тохиолдол илэрсэн хоёрдугаар сарын 28-наас хойш анх удаа халдвартай хүн нэг ч үлдээгүй гэнэ.

Шинэ Зеландын Эрүүл мэндийн яамны мэдээлснээр тус улсад нийтдээ 1504 халдварын тохиолдол бүртгэгдсэн байна. Үүнээс 1482 нь эдгэрч, 22 хүн нас баржээ. Халдварын хамгийн сүүлчийн тохиолдол тавдугаар сарын 22-нд бүртгэгдсэн аж. Энэ хугацаанд нийтдээ 295 мянган хүнийг коронавирусийн шинжилгээнд хамруулсан байна.

Шинэ Зеландад тахлын нөхцөл байдал тогтворжсоны дараа эрх баригчид хязгаарлалтын арга хэмжээнүүдийн ихэнхийг цуцалсан юм. Улмаар нийтийн тээврийн үйл ажиллагааг бүрэн сэргээж, улс дотор зорчихыг зөвшөөрсний дээр бүх дэлгүүр, үйлдвэр, төрийн болон хувийн хэвшлийн байгууллагууд нээгджээ. Түүнчлэн дунд болон дээд сургуулиудын хичээл орж эхэлсэн аж. Нийтийн хоол, үйлчилгээний салбаруудад зарим төрлийн хязгаарлалт үйлчилж байгаагийн дээр олон нийтийн арга хэмжээний оролцогчдын тоонд хязгаарлалт тавьсан байна.  

Г.Бямбасүрэн