Оросын Алтайн хязгаарт "Спутник V" вакциныг тариулсан эмч нар коронавирусийн халдвар туссан талаарх мэдээлэл гарсан. Энэ нь тухайн эмч нарт вакцинжуулалтын дараа дархлаа тогтож амжаагүй байсантай холбоотой байж магадгүй гэж ОХУ-ын Эрүүл мэндийн яам мэдэгджээ.

"Спутник V" вакциныг хоёр удаа хийдэг. Эхний тарилгыг хийснээс 21 хоногийн дараа хоёр дахь тарилгыг хийнэ. Хоёр дахь тарилгаас хойш гурван долоо хоногийн дараа өвчтөн вакцинжуулагдсан мөн коронавирусийн халдвараас хамгаалагдсан гэж үзнэ. Алтайн хязгаарт эмч нарт эхний тарилгыг есдүгээр сарын 25-30-ны хооронд хийсэн бол тэд үүнээс хойш 7-10 хоногийн дараа өвчилсөн" хэмээн ОХУ-ын Эрүүл мэндийн яам тайлбарлажээ. 

Түүнчлэн ЭМЯ вакцинжуулалтад хамрагдсан иргэдийг хоёр дахь тарилга хийлгэснээс гурван долоо хоногийн дотор  урьдчилан сэргийлэх, халдвараас хамгаалах бүхий л арга хэмжээг мөрдөн, амны хаалт зүүж, хүн хоорондын зай баримталж, олон нийтийн газар, нийтийн тээврийн хэрэгслээр явахгүй байхыг зөвлөсөн байна. 

Алтайн хязгаарын Эрүүл мэндийн яамны мэдээлснээр, вакцин хийлгэснийхээ дараа халдвар авсан гурван эмчийн хоёр нь эдгэрч, ажилдаа орсон бол гурав дахь нь эмнэлгээс гарахад бэлдэж байгаа гэнэ. Мөн түүнээс дахин халдвар илрэх эсэхийг нарийвчлан шинжилж байгаа аж. 

Г.Бямбасүрэн