Жозеф Байден тэргүүтэй шинэ захиргаа батлагдвал АНУ-ын Төрийн нарийн бичгийн дарга асан, мөн 2016 оны Ерөнхийлөгчийн сонгуульд Ардчилсан намаас нэр дэвшин өрсөлдөж байсан Хиллари Клинтон НҮБ-ын дэргэдэх АНУ-ын байнгын төлөөлөгчийн албан тушаал хашиж магадгүй гэнэ. Энэ талаар холбогдох эх сурвалжуудаас авсан мэдээлэлтэйгээр Вашингтон Пост сонин мэдээлжээ.

"Анхаарал татахуйц томилгоонуудын нэг нь Хиллари Клинтоныг НҮБ-ын дэргэдэх АНУ-ын байнгын төлөөлөгчөөр томилох явдал. Ингэснээр энэхүү албан тушаал ерөнхийлөгчийн захиргаанд чухал ач холбогдолтой гэдгийг Байден харуулахыг хүсэж байгаа. Хиллари Клинтоныг томилсноор дэлхийн тавцанд АНУ-ын үүрэг оролцоо болон олон улсын хамтын ажиллагаа хумигдаж буй энэ үед НҮБ-ын нэр хүндийг дээшлүүлэх юм" хэмээн Вашингтон пост онцолжээ.

Эргэн сануулахад, АНУ-д бүх нийтийн сонгууль 11 дүгээр сарын гуравны өдөр болж өнгөрсөн бөгөөд Америкийн тэргүүлэгч хэвлэлүүдийн таамаглалаар Ардчилсан намаас нэр дэвшсэн Жо Байден ялалт байгуулахад шаардлагатай 270 саналыг авсан байна. 

Г.Бямбасүрэн