Монгол Улсын Засгийн газар говьд байх 6.75 тэрбум ам.долларын өртөгтэй далд уурхай бүтээн байгуулалтын гэрээг цуцлахаар Рио Тинтогоор зөвшөөрүүлэх гэж байгаа талаар нөхцөл байдалд ойр эх сурвалжууд мэдээлсэн гэж Financial Times мэдээлжээ.

FT мэдээлэхдээ "эрх баригч Монголын Ардын Нам болон энэ намаас сонгогдсон шинэ Ерөнхий сайд Лувсаннамсрайн Оюун-Эрдэнэ нар Оюутолгойн уурхайн далд уурхайн бүтээн байгуулалтын төлөвлөгөөг өөрчлөхийг шаардсан парламентын дарамт шахалтай нүүр тулж байгаа юм" хэмээсэн байна. 

Гэхдээ дангаар шийдвэр гаргаж, улс орон руугаа орж ирэх ирээдүйн гадаадын хөрөнгө оруулалтуудыг эрсдэлд оруулахын оронд Улаанбаатар Англи-Австралийн уул уурхайн компанид хандан илүү сайн нөхцөл санал болгох шинэ хэлэлцээр хийж, төлөвлөгөөг хамтран зогсооход бэлэн байгаа эсэхийг асуусан гэж эх сурвалжууд мэдээлэл өгчээ.

Оюутолгойн гүний өргөтгөлийн асуудал Засгийн газартай холбоотой маргаан, маргаан дагуулсаар ирсэн. Рио Тинтогийн ихээхэн чухалд тооцогдож буй энэ төслийн анхны төсөв хэдийнэ 1.5 тэрбум доллараар хэтэрч, төлөвлөсөн хугацаанаас  хоёр жил орчмоор хоцорч байгаа юм.

Өнгөрсөн сард Монголын Засгийн газар энэ төслийг зогсооно хэмээн "сүрдүүлж", ажил саатаж байгаа нь тус улсын авахаар төлөвлөж байсан эдийн засгийн үр ашгийг бууруулсан гэж мэдэгдсэн хэмээн FT онцолжээ. 

"Тус улсын гадаадын шууд хөрөнгө оруулалтын хамгийн том эх үүсвэр болох Оюу Толгой нь цалин сайтай олон ажлын байр бий болгож, сүүлийн 10 жилийн хугацаанд бараг 3 тэрбум долларын татвар, хураамжийн орлого бүрдүүлжээ" хэмээн FT цохон тэмдэглэсэн байна

Г.Бямбасүрэн