Хөл хорионы сүүлийн өдрүүд үргэлжилж байна. Дулааны энэ улиралд хатуу хөл хорио тогтоосон ч хотын гудамжинд иргэдийн хөл хөдөлгөөн тасарсангүй. үүнтэй зэрэгцээд халдварын тохиолдол ч буураагүйг ЭМЯ-ны өдөр тутмын мэдээллээс харж болно. Тухайлбал, өчигдрийн байдлаар 1311 хүнд коронавирус илрэв. Ингэснээр манай улсын нийт батлагдсан тохиолдол 24 195 боллоо Мөн халдварын улмаас хоёр хүн нас барж, нийт нас барсан хүний тоо 51 болж байна.
Тэгвэл “хатуу хөл хорионы үр дүн юу байв” гэдэг асуултыг олон хүн Засгийн газраас асуухыг хүсэж байгаа. ЭМЯ-ны мэдээллийн үеэр ч сэтгүүлчид уг асуултыг олонтоо асууж байна. Гэтэл хариулт үгүй. Харин Эрүүл мэндийн байгууллагаас "хатуу хөл хориог үргэлжлүүлэх чиг бодлого баримталж байгаа. Учир нь халдварын тохиолдлын тоо буурахгүй байна. Тохиолдлын тоо нэмэгдэх тусам нас баралт нэмэгдэж байгаа. Мөн иргэдийн зүгээс ЭМЯ-ны цахим хаяг руу хатуу хөл хорионы чанарыг сайжруулах санал ирж байна. Уг саналуудыг анхаарч үзэх хэрэгтэй" гэж мэдээлсэн. Тэгвэл хатуу хөл хориог үргэлжлүүлэх нь хэр үр дүнтэй вэ?
Хан-Уул дүүргийн иргэн Л.Байгалмаа:
-Манайх таван ам бүлтэй. Хөл хорионы энэ үед гэр бүлийн гишүүд дундаасаа би ажиллаж байгаа. Вакциныхаа эхний тунд хамрагдсан. Хоёрдугаар тунд нь хамрагдахаар хүлээж байна. ЭМЯ-ны мэдээг байнга үзэж байгаа. Эрүүл мэндийн байгууллагаас хөл хориог сунгах саналтай байгаа гэсэн. Хэдийгээр хөл хориог дахин сунгавал санхүүгийн хувьд хэцүү байх боловч, урт хугацааны хүндрэлээс хамгаалах боломжтой гэвэл хөл хориог сунгахыг дэмжиж байна. Харин одооных шиг ингэж хөл хорио тогтоовол хэцүү.
Хан-Уул дүүргийн иргэн Э. Энхээ:
-Хөл хориог сунгахыг дэмжихгүй байна. Хөл хорио ямар ч үр дүнгүй байна. Энэ хөл хорионы үеэр вакцины хоёр дахь тунг хийх байх гэж бодож байсан ч тэгсэнгүй. Удахгүй зун боллоо. Хэн ч гэртээ байхыг хүсэхгүй. Бүгд л гадуур гарахыг хүснэ. Тиймээс дахин хөл хорио тогтоогоод ямар ч нэмэргүй. Харин вакцинжуулалтаа л хурдасгах хэрэгтэй.
Баянгол дүүргийн иргэн Г.Отгонтуул:
-Засгийн газраас тогтоосон 15 хоногийн хөл хорионы шийдвэрт нэг ойлгомжгүй зүйл байсан нь нөхцөл байдлыг бүр ч дордууллаа. Вакцины хоёр дахь тунг нөөцлөөгүй. Удахгүй ерөнхийлөгчийн сонгууль болно. Өвчнөөр шоу хийж байна. Үнэндээ нөхцөл байдал алдаатай шийдвэр, шоунаас болж улам хүндэрч байгаа шүү дээ. Хатуу хөл хориог тогтоож байгаа бол тогтоосон шиг тогтоох хэрэгтэй. Хүмүүс олноороо гадуур явж байна. Хөл хорионы хугацаа дуусахад таван хоног үлдлээ. Гэсэн ч халдварын тохиолдол хэвээр, нас баралт нэмэгдэж хөл хорио үр дүнгүй байна.
Баянгол дүүргийн иргэн Сайхнаа:
-Хөл хориог сунгаад үр дунтэй байх уу эсвэл үгүй юу гэдгийг хэлж мэдэхгүй байна. 2021 он дуустал энэ нөхцөл байдал үргэлжилж мэднэ. Гарц шийдэл нь вакцин гэж байгаа ч манай улсад байхгүй. Эрүүл мэндийн байгууллага, Онцгой, цагдаа гэлтгүй иргэд бид ч энэ байдлаас залхаж, туйлдаж байна. Коронавирусийн цар тахал гарсан цагаас эхлээд амьдарч байгаа эсэхээ ч мартаж байгаа. Хэзээ энэ бүх зүйл дуусахыг хэн ч хэлж мэдэхгүй. Магадгүй дуусахгүй байх. Вакцин хийлгэсэн ч хэдэн сарын дархлаа тогтох нь тодорхойгүй байгаа нь бүр ч бухимдмаар байна.
М.Насан