Умард Солонгосын удирдагч Ким Чен Уны тушаалаар түүний эцэг, тус улсын удирдагч агсан Ким Чен Ирийг таалал төгсөхөд үнэн сэтгэлээсээ гашуудаагүй иргэдийг эр, эм, хөгшин залуугүй баривчилж эхэлсэн талаар оны өмнөхөн мэдээлэл тархаж эхэлсэн.
Энэхүү мэдээлэл нь одоо олон эх сурвалжийн мэдээллээр баттай болоод байгаа юм. Харин энэхүү харгис шийдвэрээ нуун дарагдуулахын тулд Ким Чен Ун ирэх хоёрдугаар сарын 1-нд өвөг эцэг болон эцгийнхээ дурсгалыг хүндэтгэж тус улсын шоронгоос олон мянган хоригдлуудыг суллах тушаал гаргаснаа нийтэд зарлаад байгаа.
Гэсэн ч олон улсын ажиглагчдын зүгээс энэ нь харгис алхмаа хаацайлах ёс төдий мэдэгдэл хэмээн үзэж байгаа юм. Одоогоор Олон улсын хүний эрхийн байгууллагуудаас мэдээлж буйгаар оны сүүлээр Ким Чен Ирийг нас барсны дараагаас тус улсын шоронгууд ачааллаа даахаа больж шинээр шоронгууд барьж тийш нь өдөрт хэдэн зуугаар нь хүмүүсийг явуулж байгааг баталжээ.
Сансраас авсан гэрэл зураг дээр ч энэ нь баталгаажиж буй. Өмнө нь хиймэл дагуулаас авсан тус улсын шоронгуудын байршил улам өргөжиж хөл хөдөлгөөн ихсэж байгааг энд тэмдэглэсэн байна.
Умард Солонгосын шоронгуудад нийт 200 мянгаад хоригдол байдаг бөгөөд энэ тоо мянга мянгаар нэмэгдсээр байгаа гэнэ. Энэ нь Ким Чен Уны өөрийн дэглэмийн суурийг улам бүр баттай болгож буйн нэг жишээ ажээ.