Оросын Москва муж хоёр жилийн туршид үйлчилсэн, коронавирусийн тархалттай тэмцэх зорилготой зарим хязгаарлалтын арга хэмжээг цуцлахаар болжээ. Энэ талаарх тогтоолд Москва мужийн захирагч Андрей Воробьев гарын үсэг зурсан байна. 

КП агентлагийн мэдээлснээр, мужийн нутаг дэвсгэр, нийтийн тээвэр, эмийн сан, худалдааны төвүүд болон дэлгүүрт амны хаалт зайлшгүй зүүх журмыг цуцалсан байна. Түүнчлэн олон нийтийн газар, худалдааны төвүүд зэрэгт хүн хоорондын 1,5 метрийн зай барих журмыг ч цуцалжээ. 

Ийнхүү коронавирусийн тархалттай тэмцэх зорилгоор тавьсан зарим хязгаарлалтуудыг цуцалсантай холбоотойгоор Оросын хэрэглэгчийн хяналтын газар болон бусад холбогдох байгууллагууд эдгээр зөвлөмжийг дагаж мөрдөж байгаа эсэхийг шалгадаг ажлаа ч зогсоож байгаа аж.