Америкийн цэргийн шинжээч, Ирак дахь зэвсэглэлийн асуудал хариуцсан НҮБ-ын зааварлагч асан Скотт Риттер Украины Буча хотод болсон үйл явдлыг шинжлэн, дүгнэлт гаргажээ. 

Риттерийн өгүүлснээр, Бучад энгийн иргэдийг хөнөөсөн нь Украины цэргийнхний ажил гэнэ. Тэрбээр олон талаас нь олон баримт дээр тулгуурлан ийм дүгнэлт хийж, Твиттер зэрэг олон нийтийн сүлжээнд байршуулсан ч Твиттер түүний хаягийг блоклосон гэж КП агентлаг мэдээлсэн байна.

Бучад хэдэн долоо хоног байсан Оросын цэргүүд нутгийнхантай харилцаж, цэргийн хоолоо шинэ хүнсээр сольдог байсан гэнэ. Харин Украины цэргүүд эргэн ирээд ийм бараа солилцоонд оролцсон хүмүүсийг илрүүлэн, урвагч гэж тооцох болсон хэмээн Риттер мэдэгджээ. 

"Оросуудтай хамтран ажиллавал та нар үхнэ шүү гэж Украин ил тодоор хэлж байгаа. "Гэртээ байгаарай, үндэсний цагдаагийн газар цэвэрлэгээ хийж байна. Битгий цочирд, гэртээ бай" гэж мэдэгдсэн өндөр албан тушаалын улс төрчийн дүрс бичлэг ч бий. Украины цагдаагийнхан Буча руу цэвэрлэгээ хийхээр явж байгаа, хотод очоод урвагч гэж тооцогдсон хүмүүсийг хөнөөх зорилготой байгааг илтгэсэн дүрс бичлэг бидэнд бий. Тэд урвагчдыг баривчлах биш хөнөөх зорилготой байсан. Харин одоо хүмүүсийн цогцосыг хараад Оросын цэргүүд хөнөөсөн гэж байна" хэмээн Риттер мэдэгдсэн байна.

Эргэн сануулахад Украины Буча хотын гудамжаар олон цогцос байсан нь энгийн иргэдийнх, тэдгээрийг Оросын цэргүүд хөнөөсөн гэж барууны хэвлэлүүд болон хүний эрхийг хамгаалагчид мэдэгдэж байсан. Харин Оросын тал үүнийг няцааж байгаа юм. Тодруулбал, энэ сарын эхээр, гадаадын хэвлэлүүд мэдээлэл дамжуулахдаа, Оросын цэргүүдийн хяналтад сар орчмын хугацаанд байсан Киевийн ойролцоох суурин газруудыг Украины арми чөлөөлсний дараа Оросын цэргүүдийн үйлдсэн цэргийн гэмт хэргийн талаар онцолсон юм. 

Буча хот дахь аллага 

Оросын арми Беларусийн хил рүү ухарснаас хойш Украины цэргүүд Буча хотыг эзлэсэн байна. Энэ үйл явдлын дараа олон нийтийн сүлжээгээр Буча хотын гудамжинд олон цогцос хэвтэж байгааг харуулсан гэрэл зураг, дүрс бичлэг цацагдах болсон юм. Дөрөвдүгээр сарын хоёрны өдөр энэ хотод Ройтерс, ВВС, AFP зэрэг гадаадын хэвлэл мэдээллийн сурвалжлагчид очиж, улмаар энэ хотын гудамжинд олон тооны цогцос байгааг баталсан байна. 

Ройтерсын мэдээлснээр, гудамжинд байх цогцосууд нь энгийн хувцастай, энгийн оршин суугчид байсан гэх бөгөөд зарим цогцосыг танилууд нь харж таньсан гэнэ.  Амиа алдсан эдгээр хүмүүсийн зарим нь суманд өртөж, эсвэл минад оногдож амиа алдсан нь илт байх бол гарыг нь хүлсэн цогцос ч байсан аж. Ийм хүмүүсийг Оросын цэргүүд буудсан байх гэж Украины Ерөнхийлөгчийн захиргааны зөвлөх Михаил Подоляк мэдэгдэж байв.  ВВС агентлагийн мэдээлснээр, дөрөвдүгээр сарын нэгний өдөр Буча хотод энгийн иргэдийн 20 орчим цогцос байсан гэдгийг сурвалжлагчид нь нүдээр харсан гэнэ. 

Харин эдгээр мэдээллийг Оросын тал үгүйсгэсээр байгаа юм. ОХУ-ын албаны төлөөлөгчдийн мэдэгдсэнээр, Оросын цэргүүд хотоос гарснаас хойш дөрөв хоногийн дараа ийм мэдээлэл гарсан гэнэ. 

Г.Бямбасүрэн