Үнийн хөөрөгдөл тэнгэрт тулж, өргөн хэрэглээний бараа бүтээгдэхүүн тэр дотроо махны үнэ өдөр өдрөөр өссөөр байна. Засгийн газар мах, гурил, шатахууны үнийг тогтворжуулах хуулийг УИХ-аар батлуулж, хэрэгжүүлэх шатандаа явна. Махны холбооны удирдлагуудын хэлснээр бол махны үнийг 1000 хүртэлх төгрөгөөр бууруулах боломжтой. Тэгвэл дэлгүүр, худалдааны төвийн махны борлуулагчид энэ боломжийн талаар юу гэх бол?
Бөмбөгөр худалдааны төвийн махны лангууны худалдагчид махны үнийг бууруулах боломжгүй тухай ярьж байна. Тэднээс зарим зүйлийг тодрууллаа.
- Иргэдийн худалдан авалт хэр байгаа вэ?
- Өмнөх саруудаас эрс багассан. Баяр ёслол таарсан үед эсвэл халамж , цалин буух үед л борлуулалт нэмэгддэг. Өмнө нь зуун кг мах аваад өдөртөө зарж дуусгадаг байсан бол одоо хоёроос гурав хоногт зарж борлуулж байна.
- Махаа тогтсон нэг харилцагчаас авдаг уу? Эсвэл арай хямд үнээр зарж байгаа газраас нь авч борлуулдаг уу?
- Энүүхэндээ гэхэд арай хямдаас нь харж , шилж байж авдаг. Яг нэг тогтсон хүнээс авах хэцүү . Хотод махны үнэ буухаар малчид буцаагаад махаа татчихдаг, мах нь хомстоод үнэ нь өсөхөөр буцаагаад зардаг. Сүүлийн гурван жил иймэрхүү байдалтай байгаа.
-Засгийн газар мах, гурил, шатахууны үнийг барих хууль батлууллаа. Зохицуулалт хийвэл махны үнийг 1000 хүртэлх төгрөгөөр бууруулах боломжтой гэж байна. Ийм боломж бий юу?
-Төрөөс малчдын ашиг сонирхлыг дарах бодлого хэрэгжүүлэхгүй л бол энэ боломжгүй. Төрийн бодлого махыг жижиглэн зарж байгаа худалдаачдад маш их дарамт болно гэдгийг хэлж байна.
Харин иргэд “Боломжтой үедээ 7-10 хоногийн махаа хүнсний захаас авдаг. Харин боломжгүй үедээ өдөр өдөртөө гэрийхээ ойролцоо дэлгүүрээс дөрөв , таван мянган төгрөгөөр эсвэл зээлээр авдаг” тухайгаа ярьж байна. Мах авах бүрт үнэ нь 100, 200 төгрөгөөр нэмэгдсэн байдаг ч зайлшгүй хэрэгцээ учраас авахаас өөр аргагүй байдгаа иргэд учирлаж байна.
Бөмбөгөр худалдааны төвийн махны үнэ
| 2022 оны 04 дүгээр сарын 13 | 2022 оны 04 дүгээр сарын 19 |
| Үхрийн цул мах -16 500 | Үхрийн цул мах -16,000 |
| Үхрийн ястай мах-14,500 | Үхрийн ястай мах-14,000 |
| Хонины цул мах -12,900 | Хонины цул мах -13,500 |
| Хонины ястай мах- 12,450 | Хонины ястай мах- 13,000 |
| Адууны мах -10,400 | Адууны Мах -12500 |
| Ямааны мах-9,850 | Ямааны мах-11500 |
Махны үнэ өндөр, байнга өсөлттэй байгаа учраас иргэд нөөцийн мах сонгож байгаагаа ярьж байна. Үүнийг Баянзүрх дүүргийн 18 дугаар хорооны “Хангалуун трейд” дэлгүүрийн борлуулагч П.Норжин ч баталж байна. Тэрбээр “Манай дэлгүүрт нөөцийн махны борлуулалт харьцангуй өндөр байдаг. Долоо хоногийн зургаан өдөр 200 кг үхрийн мах, 100 кг хонины мах авч худалддаг. Ойролцоо хүнсний захаас шинэ мах авч жижиглэнгээр зардаг ч иргэд нөөцийн махыг түлхүү авдаг" гэв.
Нөөцийн махны үнэ
Үхрийн ястай мах - 8900
Хонины ястай мах - 8300
Ямааны мах- 7100
Б.Намуунзаяа
| Уншиж байна |