Даваа гарагт Оросын арми Украины нутаг дэвсгэр рүү 50 пуужин харваснаас 44 пуужинг амдан устгасан гэж Украины Зэвсэгт хүчин мэдээлжээ. Устгагдсан нэг пуужингийн хэлтэрхий Молдавын нутаг дээр унасан байна. Үүнтэй холбоотойгоор Молдав улс Оросын элчин сайдыг хөөхөөр болжээ.
Евроньюс агентлагийн мэдээлснээр, Кишинев дахь Оросын Элчин сайдын яамны ажилтан улсаасаа хөөн гаргахаар болсон талаар Молдавын Гадаад хэрэг, Европын холбооны яам мэдэгдсэн байна.
"Кишинев дахь ОХУ-ын Элчин сайдын яамны төлөөлөгчийг персона нон грата хэмээн зарлаж, түүнийг Молдав улсын нутаг дэвсгэрийг нэн даруй орхин гарах шаардлагатай гэсэн шийдвэр гаргаснаа Гадаад хэргийн яам мэдээлж байна" хэмээн яамны хэвлэлийн албанаас даваа гарагийн орой гаргасан мэдэгдэлд өгүүлжээ.
Хэвлэлийн мэдээлэлд өгүүлснээр, Кишиневд суух Оросын Элчин сайд Олег Васнецовыг 10 дугаар сарын 31-ний өдөр яаман дээр дуудан ирүүлж, шийдвэрийг дуулгасан байна.
"Хөрш орныг чиглэсэн пуужингийн цохилтууд нь аюулгүй байдлын эрсдэлийг улам нэмэгдүүлж, манай орны иргэд дайны хор уршгийг улам бүр мэдэрч байна гэдгийг нотолсон. Украины эрчим хүчний дэд бүтцийг чиглэсэн дайралтууд нь манай орны эрчим хүчний аюулгүй байдалд учрах аюул заналыг нэмэгдүүлж байна" хэмээн Гадаад хэргийн яамны мэдэгдэлд онцолжээ.
Молдав ийнхүү Оросын элчин сайдыг хөөн гаргахаар болсонд ОХУ хариу арга хэмжээ авна гэж Оросын Гадаад хэргийн яам мэдэгдсэн байна.
Г.Бямбасүрэн
Уншиж байна |