Хятадын тэрс үзэлтнүүд болон өнөөгийн дэглэмийг шүүмжлэгч сэхээтнүүд ХБНГУ-ын канцлер Олаф Шольцод хандан нээлттэй захидал илгээж, Бээжинд айлчлахаас татгалзахыг уриалжээ. 

"Ноён Шольц, Хятад руу ирэхгүй байхыг хүсье" хэмээн 185 тэрс үзэлтэн уриалгадаа онцолсон бөгөөд энэ мэдэгдлийг Table.Media сайтад нийтэлсэн байна. 

Нээлттэй захидал бичсэн хүмүүсийн өгүүлснээр, өнөөгийн Хятад улс "төвлөрсөн удирдлагатай улс болооод зогсохгүй үндсэрхэг социализмын хэв маягаар дарангуйлал руу аажмаар гулсаж" байгаа гэнэ. Тэд Хятадын удирдлагыг хүний эрхийг ихээхэн зөрчдөг хэмээн буруутгаад Өвөр Монгол, Төвөд, Шинжаан Уйгурт хүний эрхийг зөрчихийн дээр "геноцид" үйлдэж байна хэмээн мэдэгджээ. 

"Ши Жиньпин жинхэнэ дарангуйлагч болсон "

Ши Жиньпин гурав дахь удаагаа Төв хорооны ерөнхий нарийн бичгийн даргаар сонгогдсон Коммунист намын хурлын үеэр Ши Жиньпин эрх мэдлээ хэтрүүлэн ашиглаж, "жинхэнэ дарангуйлагч болсон" гэж тэрс үзэлтнүүд онцолсон байна. 

"Дотоод болон гадаад зөрчилдөөн болон нийгмийн зөрчлөөс үүдэн Ши Жиньпиний өнөөгийн дэглэм ар араасаа хямралд орж байна" хэмээн тэрс үзэлтнүүд бичээд либерал ардчиллын төлөөлөгчийн хувьд айлчлалынхаа үеэр ямар байр суурь илэрхийлэх талаар нь Шольцоос асуужээ.

Шольцод хандсан нээлттэй захидалд гарын үсэг зурсан хүмүүсийн дунд 1989 онд зэрлэгээр дарагдсан оюутны ардчилсан хөдөлгөөний тэргүүнүүд болох Ван Дань, Уэр Кайси, Берлинд амьдардаг, 2012 онд Германы номын худалдаачдын энх тайвны шагналт Ляо Иу нар багтаж байгаа гэнэ. Тэд өөрсдийгөө "Хятадад оюутан, зураач, зохиолч, яруу найрагч, сэхээтэн байсан хүмүүсийн бүлэг" хэмээн танилцуулжээ. Ийнхүү тэд ийм мэдэгдэл гаргаснаараа өөрсдийгөө аюулд учруулж байна хэмээн Table.Media онцолсон байна.

Энд дуулгахад, Шинжаанд сүүлийн жилүүдэд "дахин хүмүүжүүлэх лагерь" руу олон мянган уйгур болон үндэсний цөөнхүүдийг илгээсэн гэж хүний эрхийг хамгаалагчид мэдээлдэг. Ийм лагериудад тамлах, хэрцгий харьцах байдал түгээмэл байдгийг илтгэх баримтууд ч гарсаар байдаг юм.

Олаф Шольцын айлчлаын тухайд, тэрбээр 11 дүгээр сарын дөрөвний баасан гарагт Бээжинд айлчлахаар төлөвлөсөн. Энэ нь тэрбээр канцлер болсноос хойш Хятадад хийх анхны айлчлал болох юм.

Г.Бямбасүрэн