Камбожийн Ерөнхий сайд Хун Сений коронавирусийн шинжилгээний хариу эерэг гарчээ. Улмаар улс төрч Бали дахь G20 дээд хэмжээний уулзалтад үргэлжлүүлэн оролцохоос татгалзсан гэж РИА Новости мэдээлсэн байна. 

Индонезийн Гадаад хэргийн яамны мэдээлснээр, Хун Сен болон түүнийг дагалдан яваа төлөөлөгчид өнөөдөр, 11 дүгээр сарын 15-ны өдөр Камбожи руу буцах ёстой гэнэ. Хун Сен Индонези рүү явахаар онгоцонд суухаас өмнө эсрэг биетийн шинжилгээ өгсөн ч хариу нь өнөөдөр л гарсан байна. Балид ирээд шинжилгээ өгөхөд мөн л энэ онош батлагджээ. 

"Би өнөө орой Камбожи руу энгийн нислэгээр буцаад, очоод зочин хүлээж авахгүйгээр ажлаа үргэлжлүүлэхээр төлөвлөж байна" хэмээн Ху Сен мэдэгджээ.

Тэрбээр үүнээс өмнө Байден, Лавров нартай уулзсан гэх мэдээлэл гарч байв. Харин түүнтэй уулзсан хүмүүсийн шинжилгээний хариу ямар гарсан талаарх мэдээлэл гараагүй байна.

Г.Бямбасүрэн