“Шинэ сэргэлтийн бодлогын хурдасгуур төв”-ийн гүйцэтгэх захирал Б.Дөлгөөнөөс эдийн засгийн нөхцөл байдалтай холбогдуулан тодруулга мэдээлэл авлаа.

-2023 оны төсөв батлагдлаа. Төсөвт уул уурхайн бүтээгдэхүүний үнэ өндөр өндөр байхаар тооцсон нь эрсдэл дагуулна гэх шүүмжлэл байна. Таны хувьд уул уурхайн бүтээгдэхүүний үнийн асуудал дээр эрсдэл байгаа гэж харж байна уу?

-Өнгөрсөн хугацаанд төсөвт учирч байгаа бэрхшээлүүдийг харахад үнэ асуудал байгаагүй. Үнээс илүүтэй уул уурхайн бүтээгдэхүүнийг хэр хэмжээгээр гаргаж чадаж байна вэ, гэдэг асуудал байсан. ОУ-ын хөрөнгө оруулалтын банкуудын гаргасан таамаглалуудын дундажийг харахад зэсийн үнэд ямар нэг эрсдэл 2025 он хүртэл гарахгүй. 2022 оны эцсээр зэсийн үнэ 8700 доллар , 2023 онд тодорхой хэмжээгээр буурах хандлага ажиглагдаж байна. 2024, 2025 онд 8700 доллар  бол дундаж байна.  Дээд үнэ 10 мянга доллар байна. Нүүрсний хувьд 2023 онд бага зэргийн өсөлттэй буюу 240 доллараар гарна. Үүнээс харахад үнэ тал дээр ямар нэг асуудал гарахгүй гэсэн үг. Гол эрсдэл нь Хятадын коронавируст халдварын эсрэг бодлого, үүнтэй уялдаатай хил гаалийн хүндрэл. Энэ хүндрэлийг зохион байгуулалтын аргаар зохицуулж чадах юм бол богино хугацаанд санаа зовох зүйлгүй.

-Валютын сангийн хөтөлбөрт орох уу, үгүй гэх асуудал олон нийтийн анхаарлыг татаж байна.Таны зүгээс үүнд ямар хариулт өгөх вэ?

-Нэг жишээ ГАНА улс. ОУВС-ын хөтөлбөрт орохоор яриа хийгээд явж байна. Гэхдээ тухай улс ОУВС-ын хөтөлбөрт орох нөхцөл байдалтай байгаа юу гэвэл үгүй. 2023 он бол гадаад зах зээл дээр эрсдэл өндөртэй жил учраас тус яриагаа эхлүүлээд байна. Монгол Улсын хувьд яг өнөөдөр ОУВС-ын хөтөлбөрт орох нөхцөл бүрдээгүй.  Цаашид төлбөрийн тэнцэлд анхаарал хандуулах хэрэгтэй болж байна.

- “Шинэ сэргэлтийн бодлогын хурдасгуур төв” нь одоогоор ямар үүрэг чиглэлтэй ажиллаж байна вэ?

-Шинэ сэргэлтийн бодлогын баримт бигийг  Монгол Улсын Засгийн газраас боловсруулж УИХ-аар батлуулан төрийн бодлого болж үндэсний хэмжээнд хэрэгжиж эхлээд байна. Манай хурдасгуур төв бол энэ бодлогод туссан арга хэмжээг хэрэгжүүлэхэд уялдаа холбоогоор хангах, эргээд шаардлагатай судалгаа шинжилгээний ажлуудыг хийх үндсэн үүрэгтэйгээр байгуулагдсан. Мэдээж Шинэ сэргэлтийн бодлогыг олон талаар олон нийтэд танин мэдүүлэх ажлууд ч багтсан байгаа.  Шинэ сэргэлтийн бодлогын хүрээнд ЗУРГААН зорилт байгаа. Зургаан зорилтын хүрээнд 99 үйл ажиллагаа, 94 төсөл байна. Ирэх 10 жилд хэрэгжих төслийн жагсаалт. Ойрын хугацаа, дунд хугацаа, урт хугацаандаа хэрэгжүүлэх ажлууд багтсан.

-Судалгаа хийгээд ажил нь эхэлсэн ямар ямар төслүүд байна вэ?

-Эрчим хүчний төслүүдийн ажил эхэлсэн байна. Тухайлбал, Чойбалсангийн цахилгаан станцыг өргөтгөх төсөл хэрэгжиж эхэлсэн. Гүйцэтгэл сайтай байна. 2023 ондоо багтаад өргөтгөлийн ажлыг хүлээлгэн өгөх боломжтой. Харин огт хэрэгжиж эхлээгүй нь ТЭЦ 4 станцын зуухны өргөтгөлийн ажил байна. Энэ зуухны өргөтгөлийг хийж байж Улаанбаатарын иргэдийн цахилгаан дулааны найдвартай байдал хангагдах нөхцөл бүрдэнэ.

П.ГОО