Найруулагч Жеймс Кэмероны бүтээл болох "Avatar: The Way of Water" кино олон улсад нээлтээ хийснээсээ хойш нэг тэрбум гаруй ам.долларын орлого олжээ. Энэ талаар Box Office Mojo сайт мэдээлсэн байна. 

"Аватар-2" кино АНУ-д 317,4 сая доллар олсон бол хилийн чанадад 712 сая долларыг олжээ. Одоо энэ кино 2022 оны хамгийн орлоготой кинонуудын жагсаалтад хоёрдугаарт бичигдэж байна. Жагсаалтыг "Топ Ган:Маверик" тэргүүлж байгаа бөгөөд Жозеф Косинскийн энэ кино 1,4 тэрбум долларын орлого олжээ.

Энд дуулгахад, Жеймс Камерон "Аватар" кино нь амжилтад хүрвэл хоёр дахь киног бүтээнэ гэж 2006 онд мэдэгдэж байлаа. Ингээд 2010 онд мэдэгдэл хийхдээ дахин хоёр кино хийхээр төлөвлөсөн, эхнийх нь 2014 онд гарна хэмээж байв. Гэвч усан дор зураг авах технологи шаардлагатай байсан зэргээс болоод төсөл хэрэгжих хугацаа хойшилж, 2017 оны наймдугаар сарын 15-ны өдөр урьдчилсан зураг авалтуудыг эхлэж байлаа. Дараа нь, мөн оны есдүгээр сард "Аватар-3"-ын зураг авалтыг хийж байв. "Аватар-2"-ын зураг авалт 2020 онд дууссан бөгөөд ийнхүү саатахад дэлхий дахиныг бүрхсэн цар тахал ихээхэн нөлөөлжээ.

Г.Бямбасүрэн