УИХ-ын чуулганы өнөөдрийн хуралдаан эхэллээ. Өнөөдрийн хуралдаанаар найман асуудал хэлэлцэнэ. 

Чуулганы хуралдааны эхэнд УИХ-ын гишүүн Б.Пүрэвдорж " Маргааш Үндсэн хуулийн нэмэлт өөрчлөлтийн төсөл орж ирэх нь. 152 гишүүнтэй болох юм байна. Өнгөрсөн долдугаар сараас хойш Ховд аймагт 60 удаагийн уулзалт хийсэн. Бусад таван аймгийн сумуудаар явж уулзалт хийсэн. Уулзалтын үеэр иргэдэд "Гишүүдийн тоог 98-ээс дээш нэмж болохгүй. Сонгуулийн холимог тогтолцоо сонгогчдын саналыг гээдэггүй сайн тогтолцоо. Жагсаалтын ард хулгай зэлхий хийдэг, нам санхүүжүүлээд мөнгө олдог хүмүүсийг жагсаах нь буруу" гэсэн саналаа ярьж явсан. Ирэх нэг дэх өдрөөс эхлэн гишүүд тойрог дээрээ очиж УИХ-ын гишүүдийг 152 болгох асуудлаа ярих юм байна. Би бол өөрийнхөө өмнө нь ярьж байсан зүйлээ л ярина. УИХ-ын гишүүн сонгогчдын саналаа л дамжуулдаг байх ёстой.

ҮАБЗ-ийн гурван дарга бие биенээ ухуулаад байдаг. Ард түмэн өөр зүйл ярьж байна. Та нар ирэх нэг дэх өдрөөс үнэнтэй нүүр тулна. Сонгогчдоо ухуул, өөрсдийгөө л ухуулаад байх юм. Ард иргэд Ардын намын гишүүд очихоор тэдний талд Ардчилсан намын хүн очихоор бас тэдний талд гээд гишүүдийгээ аялдан дагалдсан байдалтай байгаад байна. Сонгогдсон гишүүдийнхээ нүүрэн дээр болохгүй асуудлаа хэлэл дээ. Чимээгүй байгаад байвал 152 гишүүнтэй болох нь байна шүү. Иргэд гишүүдтэй уулзахдаа 152 болгоно гээд байгаа гишүүддээ дахин сонгогдохгүй болтол нь сайн хэлж ярьж өгөөрэй гэж хэлье" гэлээ. 

П.ГОО