Монголын Ардчилсан Холбооны Ерөнхий чуулган өчигдөр хуралджээ. Уг хуралдаанаар тус холбооноос ард түмэндээ хандаж, дараахи агуулга бүхий мэдэгдлийг гаргасан байна. Уг мэдэгдэлд “Өнөөдөр монголчууд бид жинхэнэ ардчилсан шударга дэг журмаар, олонхийн язгуур эрх ашгийн төлөөх хуулиар бус харин Үндэстэн дамнасан корпорацуудын зохиож өгсөн “баялгийн хараалын” дүрмээр амьдарч байна.
Энэ дүрмийн дагуу монгол хүн бүрт 21 мянган төгрөг оногдож, тэрний тал нь ирээдүйд төлөх ёстой өр болон хоцорч байгаа бол үндэсний олигархи гэгдсэн цөөн хэдэн хүнд тус бүр 21 сая долларын цэвэр ашиг, харин тэдний цаад эзэд нь болсон үндэстэн дамнасан корпорациудад 21 тэрбум долларын цэвэр ашиг оногдож байна.
Энэ шударга ёс, ардчилсан хууль зүй мөн үү? Энэ бол тэртээ 1990 онд бидний хүсч, тэмүүлж, зорьж байсан “Ардчилал” биш гэдгийг МоАХ хариуцлагатайгаар мэдэгдэж байна. Бид эрх зүйт төртэй, шударга ёсыг хэм хэмжээгээ болгосон хүмүүнлэг, иргэний ардчилсан нийгэмд амьдрахыг хүссэн. Тэмцсэн. Ялсан. Гэвч Монголын ард түмний түүхэн ололтыг өнөөдөр нам дамнасан бүлгүүдэд хамаарах хэдхэн луйварчид гадаадынхантай үгсэн үгүй хийх хэмжээнд очжээ.
Үүнийг өөрчлөхийн тулд шинэ нийгмийг хуучин хүчнээр цогцлоохоор итгэж Монгол Улсыг 70 жил дампуурал, мухардлын замд хөтөлж байсан МАХН, МАН-ыг удаа дараа эрх бариулахаар сонгуулж байсан нь бидний хамгийн том алдаа болсныг ухаарцгаая!
Учир иймд МоАХ эх орондоо жинхэнэ ардчилал, шударга ёс, эрх зүйт засаг төр, иргэний нийгмийг байгуулах ариун тэмцэлд дахин босох, нэгдэн нягтрахад Монголын ард түмнийг уриалан дуудаж байна” гэжээ.