Манай сайт өнөөдрөөс эхлэн Цэвэгмид эмчийн зөвлөгөөг хүргэх боллоо. Уртнасангийн Цэвэгмид, АУ-ны доктор, ЭХЭМҮТ-н Хүүхдийн хүлээн авах Яаралтай тусламжийн тасагын эрхлэгч юм. Тэрээр  охид бүсгүйчүүд ээж аавуудад зориулан зөвлөгөө өгөхөөр болоод байгаа билээ.Энэ удаа жирэмсэн эмэгтэйчүүдэд зөвлөж байна. Дараа нь төрөлт, төрхийн дараа, хүүхэд гээд зөвлөгөө өгөх учраас уншигчид та бүхэнд Цэвэгмид эмчээс асуух асуулт байвал танай сайтын  сэтгэгдэл үлдээх хэсэгт асуултаа үлдээнэ үү. Бэлгийн харьцааны дараа эр бэлгийн эс эхлээд умайн хөндийд, дараа нь үр дамжуулах хоолойд ирж өндгөн эстэй таарна. Өндгөн эсийг олон тооны сперматозоидууд хүрээлж авах ба түүний нягт бүрхүүлийг хайлуулах фермент ялгаруулдаг. Нэг л сперматозоид өндгөн эсэд нэвтэрч орсноор урвал явагдаж эр, эм эсийн бөөмүүд нийлж үр хөврөл үүсгэнэ. Эмэгтэй хүнд сард ганцхан өндгөн эс боловсордог бол, эрэгтэй хүний эр бэлгийн эс тасралтгүй боловсорсоор байдаг. Эрүүл эрэгтэй хүний 1мл үрийн шингэн дотор 20 сая гаруй сперматозоид байдаг. Бэлгийн эсийн бөөм нь удмын мэдээлэл дамжуулах үүрэгтэй. Хүний биеийн бүх эсийн бөөм 46 хромосомтой байх бөгөөд өөрөөр хэлбэл 23 хос хромосомтой байдаг. Харин бэлгийн эс 23 хромосомтой байх ба эр, эм эс нийлсэний дараа 46 хромосом болдог байна. Өндгөн эс – Х-хромосом, сперматозоид – Х эсвэл Y-хромосомтой байна. Х-хромосомтой сперматозоид өндгөн эсэд нэвтэрсэн бол ХХ бүрдэл хромосомтой болох бөгөөд охин, харин  Y-хромосомтой сперматозоид өндгөн эсэд нэвтэрсэн бол ХY бүрдэл хромосомтой болох бөгөөд хүү төрнө. Үр нийлсэн өндгөн эс нь үр хөврөл болон хувирна. Үр хөврөл нь үр дамжуулах хоолойгоор дамжин явсаар умайн хөндийд бууж ирэн, умайн хананд бэхлэгдэнэ. Энэ нь биений юм ирсэн эхний өдрөөс хойш 20 – 21 дэх өдөрт, үр нийлсэнээс хойшхи 6 – 7 дахь өдөрт явагдана. Энэ үед үр хөврөл устах магадлал нь 50% байх ба эрт үеийн зулбалт явагдаж цус алдалтаар илрэх бөгөөд эмэгтэйчүүд дараагийн биений юм ирлээ гэж ойлгоод өнгөрдөг байна. Н.Ариунаа