Олимпийн мөнгө, Дэлхийн аваргын алтан медальт  МУГТ П.Сэрдамба 2011 оны Дэлхийн аваргаас хүрэл медальтай нутагтаа ирлээ. Өнөөдөр өглөө Чингис хаан нисэх онгоцны буудалд буусан түүнтэй цөөн хором ярилцлаа. Дэлхийн аваргаас хүрэл медаль хүртсэнд баяр хүргэе. Манай уншигчдад сэтгэгдлээсээ хуваалцахгүй юу? Баярлалаа. Эхний тулаанууд бүгд л хэцүү байлаа. Маш хүчтэй, бяртай тамирчид учраа таарсан. Тулаанууд бол ойролцоо, өрсөлдөгчтэйгөө оноо ойрхон хүндхэн болж өнгөрлөө. Бүх л өрсөлдөгч хүчтэй байлаа. Медалийн өнгөө хувиргах мөнгийн төлөөх тулаанаа БНСУ-ын тамирчинтай хийсэн. Хэрвээ Солонгосын тамирчинг ялбал дэлхийн аваргын алтан медалийн төлөө Хятадын боксчин Зоу Шиминтэй өрсөлдөх байлаа. Та хоёр Бээжингийн олимпийн алтан медалийн төлөө учраа таарч байсан. Бокс сонирхогчид ч бас та хоёрыг аваргын төлөө тулалдаасай гэж хүсэж харж байсан байх? Би өөрөө ч Солонгосын боксчиныг хожно гэдэгтээ маш их итгэлтэй байсан. Тэгээд болсонгүй. Гэхдээ би өрсөлдөгчөө хожсон бол Хятадыг нөгөө талын зооноос аваргын төлөө өрсөлдөхөөр гарч ирнэ гэж бодсон. Хэрвээ би Солонгосыг хожсон бол олимпийн финал дахин давтагдах байлаа. /инээв/ Хүрэл медалийн төлөөх тулаанд өөрөө нэлээд дайчин, хурдтай тулааныг хийж байсан. Харин өрсөлдөгч Кубын боксчин сандарсан, биеэ барьсан байдалтай байсан. Яг энэ тулааны үед өөрт тань юу гэж бодогдож байв? Кубын тамирчин гарч ирээд, эхлээд намайг ажиглаад байгаа юм болов уу гэж бодсон. Тэгээд тулааны үед өрсөлдөгч ерөөсөө ажиллаагүй, би ч ялна гэдэгтээ өөртөө итгэлтэй байлаа. Мөнгөн медалийн төлөө Солонгосын тамирчинтай тулалдаж байх үед юу бодогдож байв. Түүний хувьд шинэ залуу тамирчин байлаа. Энэ тулааны талаар? Солонгосын тамирчинтай хоёр дахь удаагаа учраа таарлаа. Сая өнгөрсөн 8-р сард БНСУ-ын Инчён хотноо болсон боксын ААШТ-д бас таарч тоглосон. Энэ удаад дэлхийн аваргаар бас дахин таарч тулалдлаа. Залуу, хурдтай, хүчтэй бас өндөр нуруутай, нэлээд өсөж яваа тамирчин байлаа. Цаашдаа миний жингийн нэлээд хүчтэй өрсөлдөгчдийн нэг. Саяны дэлхийн аваргын шүүлт хэр санагдав. Манай тамирчдын хувьд тэр дундаа ОУХМ Д.Отгондалай, МУГТ У.Мөнх-Эрдэнэ гээд эдгээр тамирчдын тулаан дээр шүүлтийн асуудлыг хүмүүс ярьж байна л даа? Шүүлт бол ерөнхийдөө гайгүй ээ. Шүүлтийн дүрэм өөрчлөгдсөн. Яг тэмцээний тоглолтын дундуур оноо харагдахгүй болохоор тамирчдад, бидэнд хүндхэн байгаа. Харин манай Мөнх-Эрдэнэ, Отгондалай нар дээр шүүлтийн жаахан тиймэрхүү юм гарсан. Отгондалай маань бас харамсалтайгаар оноо тэнцэж ялагдсан. Олимпийн эрх олгох тэмцээн дээр оноогоор тэнцэж ялагдана гэдэг бол маш хүнд асуудал л даа. Өөрийн тань дасгалжуулагч Д.Ганзориг багш өөрийг тань рингэнд гарахын өмнө юу хэлсэн бэ? Рингэнд гарахын өмнө багш бидний биеийг халаалгаад тэгээд гаргадаг. Янз бүрийн юм нэг их ярьдаггүй. Харин тулаан эхэлсэний дараа 2-р раундаас За ингэж ажилла, өрсөлдөгч чинь тийм тамирчин байна гэж хэлж байсан. Ер нь урьд нь өрсөлдөгчийг харсан тохиолдолд багш тэгэж ажиллана шүү, миний хүү гэж хэлээд рингэнд гаргадаг. За баярлалаа.