Маргааш  тохиох  Дэлхийн Хавдартай тэмцэх дэлхийн өдрийг  “Хамтдаа хавдрыг бууруулж чадна” гэсэн уриатайгаар   тэмдэглэн өнгөрүүлэх юм байна.  Үүнтэй холбогдуулан “Хавдарын эсрэг үндэсний аян”-ы нээлт өнөөдөр  ХСҮТ-д боллоо. Энэхүү арга хэмжээнд ЭМ-ийн сайд Н.Хүрэлбаатар, ХСҮТ-ын ерөнхий захирал Л.Төмөрбаатар, ХААН банкны Бизнес харилцаа хариуцсан дэд захирал Д.Батсайхан, МҮОНРТ-ийн захирал М.Наранбаатар нар оролцож хамтран ажиллах гэрээнд гарын үсэг зурав. Хоёрдох жилдээ зохион байгуулагдаж буй тус аяны хүрээнд эрсдэлт 12 аймгийн иргэдэд хандсан эмнэлгийн үйлчилгээг ХСҮТ-ийн эмч мэргэжилтнүүдийн баг ажиллах юм байна. Монгол улсын хүн амын дунд өвчлөл, нас баралтын тэргүүлэх шалтгааны нэг болоод байгаа хорт хавдрын  өвчлөлийг бууруулахад МҮОНРТ болон ХААН банк сангаас туслалцаа үзүүлж буй.  МҮОНРТ-ийн хувьд нийслэл төдийгүй хөдөө орон нутгийн иргэдэд зориулсан эрүүл мэндийн зорилтот нэвтрүүлэг болон ХСҮТ-ийн эмч мэргэжилтнүүд оролцсон нэвтрүүлгүүдийг олон нийтэд түгээх үүрэг хүлээдэг байна. Харин ХААН банк сангаас өнгөрсөн онд 160-аад сая төгрөгийн санхүүжилт гаргаж, ХСҮТийн эмч нарын баг монгол орны 21 аймаг, Улаанбаатар хотод ажиллах нөхцөл болоцоог нь хангаж өгчээ. Уг аяны хүрээнд эрсдэлт бүлгийн нийт 20 мянга орчим иргэдийг үзлэг оношилгоонд хамруулж, 19 хувь нь хортой болон хоргүй хавдар, 54 хувь нь суурь өвчтэй хэмээн оношилж, 100 гаруй мэс ажилбарийг орон нутагт амжилттай хийсэн аж. Н.Дэлгэр