Нийслэлийн Хан-Уул дүүргийн Засаг даргын Тамгын газрын Нийгмийн хэлтсээс санаачлан Ерөнхий боловсролын сургуулийн сурагчдыг зам тээврийн осолд өртөхөөс урьдчилан сэргийлэх үүднээс 5418 хүүхдэд гэрэлтдэг ханцуйвч, цүнхний уут хүлээлгэн өглөө. Тус дүүргийн авто замтай ойр байрладаг Буянт-Ухаа цогцолбор, Цэцээ гүн, 114, 34, 41, 75, 32, 10, 118 дугаар сургуулийн 1-5 дугаар сурагчид хамрагдсан байна. Дашрамд дурдахад, өнгөрсөн оны нийслэлийн хэмжээнд 344.8 мянган авто тээврийн хэрэгсэл бий гэсэн судалгаа гарсан.
2011 оны эхний есөн сарын байдлаар гэхэд улсын хэмжээнд нийт 41791 зам тээврийн ослын дуудлага хүлээн авсныг өмнөх оны мөн үетэй харьцуулахад 16713 буюу 63.3 хувиар өссөн үзүүлэлт аж. Улсын хэмжээнд зам тээврийн ослын улмаас 2011 оны эхний 9 сард 282 хүн нас баржээ. Сүүлийн таван жилийн тоон үзүүлэлтийн дунджаар нийслэлд зам тээврийн ослын улмаас 34 хүүхэд амь насаа алдсан бол өнгөрсөн онд нийслэлийн хэмжээнд нийт 796 хүүхэд бэртэж гэмтэн, 11 хүүхэд нас барсан байна.
Д.Цэцэг