Баянгол дүүргийн Эрүүгийн цагдаагийн тасгийн хэрэг бүртгэгч, мөрдөн байцаагч нар өнгөрөгч долоо хоногийн баасан гарагт баривчлагдсан гэсэн мэдээлэл өнөөдөр зарим сайтуудаар цацагдсан юм. Уг мэдээллийг Улсын ерөнхий прокурорын дэргэдэх Мөрдөн байцаах албаны дарга Б.Галдаагаас тодрууллаа.
Танай албанынхан цагдаагийн ажилтнуудыг саатуулсан гэсэн мэдээлэл хэвлэлээр цацагдаад байна. Албан ёсны мэдээлэл өгөөч?
-Цагдаагийн зарим албан хаагчийг саатуулсан нь үнэн. Одоогоор хэргийг дөнгөж шалгаж эхэлж байна.
-Цагдаагийн ахлагч цолтой дөрвөн хүнийг авлигын хэргээр хорьсон юм уу?
-Тийм.
-Тэднийг сэжигтнээр татсан зүйл заалтыг тодорхой хэлээч, хэдэн хүн хохирогчоор тогтоогдсон бэ?
- Гэмт хэргийн шинжтэй мэдээллийг шалгаж эхэлж байгаа үед хэргийн талаар дэлгэрэнгүй мэдээлэл өгөх боломжгүй. Монгол Улсын Эрүүгийн хуулийн 268 дугаар зүйлд зааснаар /хээл хахуул авах/ гэмт хэрэгт өнгөрөгч баасан гарагаас эхлэн дээрх дөрвөн албан хаагчийг сэжигтнээр тооцон, цагдан хорьсон. Хэргийг нь шалгаж байна.
-Хоригдсон ахлагч нар эхний мэдүүлгээ өгсөн үү. Хэдэн хүнээс авлига авсан хэрэгт сэжиглэж байгаа юм бол?
-Мөрдөн байцаалтад байгаа хэргийн талаар тодорхой ярих боломжгүй гэж хэллээ шүү дээ.
- Тэгвэл авлигын хэргийг яагаад АТГ шалгахгүй танайх шалгаж байгаа юм бэ?
-Тусгай харьяаллын хэрэг учраас манай албанд шалгана.
Н.Түвшин