Цагдаагийн хэд хэдэн албан хаагч нар авлигын хэргээр Прокурроын дэргэдэх Мөрдөн байцаах албанд шалгагдаж буй тухай мэдээллийг тус албаны дарга Б.Галдаагаас тодруулж өмнө нь хүргэсэн. Тэгвэл Цагдаагийн ерөнхий газрын Хэвлэл мэдээллийн төвийн дарга, цагдаагийн хурандаа Т.Сайнжаргал дараах мэдээллийг өгч байна.
-Баянгол дүүргийн Эрүүгийн цагдаагийн алба хаагчид бусдаас их хэмжээний авлига авсан тухай мэдээлэл гарах боллоо. Энэ талаар тодруулах гэсэн юм?
-“Үндэсний шуудан” сонин болон зарим мэдээллийн сайтад Эрүүгийн цагдаагийн алба хаагчид бусдаас их хэмжээний авлига авч цагдаагийн алба хаагчдыг баривчилсан тухай ташаа мэдээлэл гаргасан байна. Баянгол дүүргийн Эрүүгийн цагдаагийн алба хаагчдаас эрүүгийн хэрэгт холбогдон шалгагдаж, баривчлагдан цагдан хоригдсон явдал байхгүй.
-Хушны самрын ченжүүдээс цагдаагийн алба хаагчид авлига авсан хэрэгт эрүүгийн хэрэг үүсгэн шалгаж байгаа гэсэн мэдээлэл байна?
-Эргүүлийн цагдаа нар бусдаас авлига авсан байж болзошгүй тухай иргэдийн мэдээллийг ЦЕГ-ын Дотоод хяналт, шалгалт аюулгүй байдлын хэлтэс шалгаж тогтоосон. Эдгээр алба хаагчдыг ёс зүйн дутагдлаар цагдаагийн байгууллагаас халж, асуудлыг шалгуулахаар харьяаллын дагуу УЕП-ын газрын дэргэдэх Мөрдөн байцаах албанд материалыг шилжүүлсэн.