Засгийн газрын ээлжит хуралдаан өнөөдөр болно. Хуралдаанаар хэлэлцэх асуудлын төлөвлөгөөнд 26 асуудал багтжээ.
УИХ-ын гишүүн Р.Будын санаачлан боловсруулсан Авто замын тухай хуульд нэмэлт, өөрчлөлт оруулах тухай хуулийн төсөл, Санхүүгийн хэлэлцээрийг соёрхон батлах тухай, Дулааны цахилгаан станц 5-ыг барих асуудлыг эрчимжүүлэх тухай, ACEM-ийн гишүүн орнуудын Байгаль орчны сайд нарын түвшний уулзалт зохион байгуулах тухай, Гадаадаас мэргэжилтэн, ажиллах хүчин оруулах тухай зэрэг асуудлыг хэлэлцэх юм байна.
Мөн аймгуудын төвөөс эхлэх авто замын талаар авч хэрэгжүүлэх зарим арга хэмжээний тухай хэлэлцэж, Засгийн газрын үйл ажиллагааны хөтөлбөрийн хэрэгжилтийг эрчимжүүлэх асуудал болон “Хүний хөгжил сан”-гийн 2012 оны төсвийн асуудалтай танилцах аж.
Түүнчлэн Их сургуулийг хотхоноор хөгжүүлэх ажлын явц, цаашид авах арга хэмжээний талаар, Мянганы хөгжлийн зорилтуудыг хэрэгжүүлэх зарим арга хэмжээний талаар, Орон сууцжуулах чиглэлээр хэрэгжүүлж байгаа ажлын явц, цаашид хэрэгжүүлэх арга хэмжээний талаар хэлэлцэхээр төлөвлөжээ.
С.Жигүүр