УИХ-ын чуулганы өчигдрийн хуралдаан оройн 18.30 цагийн орчимд өндөрлөсөн юм. Хуралдаан өндөрлөж, чуулганы танхимд цөөн тооны гишүүд үлдсэн байх үед Боловсролын тухай хуульд нэмэлт, өөрчлөлт оруулах тухай хуулийн төслийг хэлэлцсэн юм.
Энэ хуульд хувийн хэвшлийн ерөнхий боловсролын болон их, дээд сургуулиудын багш, ажилчдын мэргэжил дээшлүүлэх сургалтын төлбөрийг төрөөс төлөхөөр тусгагдсан юм. Мөн улс, хувийн гэж ялгалгүй бүх сургуулийн багш ажилчдад улсаас тэтгэмж олгохоор болоод байгаа.
Үүнийг нь Э.Мөнх-Очир, Д.Очирбат нарын гишүүд эсэргүүцсэн учраас төсөл санаачлагч С.Эрдэнэ гишүүн хуулийн хэлэлцүүлгээ хойшлуулчихаад ийн ууртай гарч ирсэн юм байна.
Тэрбээр чуулганы танхимд Э.Мөнх-Очир гишүүнийг “Хүрэлсүхдээ зодуулж байхдаа таарсан амьтан” гэсэн бол Э.Мөнх-Очир гишүүн “Даргадаа зодуулах зүгээр байдаг юм” гэв.
Энэ мэтчилэнгээр тэдний хэрүүл үргэлжилсээр УИХ-ын чуулганы танхимаас гарахад УИХ-ын гишүүн С.Эрдэнэ, “Муу бацаан минь. Чамайг ийм гэж бодсонгүй” гэх нь сонсдоно.
Цаанаас нь Э.Мөнх-Очир гишүүн дуугүй байсангүй тул С.Эрдэнэ гишүүн “Юу гэнэ ээ” хэмээн түүн рүү очоод бараг л цохиод авах нь уу гэлтэй дүрэлзэв. Харин Сангийн сайд Д.Хаянхярваа тэднийг зохицуулж С.Эрдэнэ гишүүнийг цааш дагуулан явлаа. Уурандаа багтарсан С.Эрдэнэ гишүүн замдаа “Дандаа шударга царайлдаг юм, энэ бацаан” гэсээр цааш явж одов.
С.Жигүүр