Мэргэжлийн хяналтын ерөнхий газраас бууз, баншны үйлдвэрлэл эрхэлж буй аж ахуйн нэгжүүдэд шалгалт хийжээ. Шалгалтыг аймаг, нийслэлийн мэргэжлийн хяналтын байцаагч нар мал эмнэлэг, хөдөлмөрийн эрүүл ахуйн хяналтын улсын байцаагчид хамтран гүйцэтгэсэн байна. 14 аймаг, нийслэлийн есөн дүүрэгт бууз, баншны үйлдвэрлэл эрхэлдэг 87 аж ахуйн нэгж шалгалтад хамрагдсан байна.
Шалгалтад хамрагдсан газруудын 42 хувь нь зориулалтын байргүй, хүнсний аюулгүй байдлын шаардлагад нийцүүлэх тал дээр санаачилгагүй байсан байна. Түүнээс гадна мөн төдий хэмжээний цехүүд угаалга, цэвэрлэгээ, хортон шавьж, мэрэгчдээс урьдчилан сэргийлэх халдваргүйжүүлэлт хийх журам, хуваарь байхгүйн дээр мах, өөхөндөө мал эмнэлэг, ариун цэврийн гэрчилгээтэй авдаг боловч бүртгэл хөтөлдөггүй зэрэг нийтлэг зөрчил илэрчээ.
Уг шалгалтаар нийтдээ 826 зөрчил илэрснээс 12 хуулийн этгээдэд 1.4 сая төгрөгийн торгууль ногдуулж, бүрэн барагдуулсан байна. Түүнчлэн шаардлага хангаагүй 11 аж ахуйн нэгжийн үйлдвэрлэл эрхлэх зөвшөөрлийг түр зогсоож, дөрвөн цехийг хаасан аж.
Д.Цэцэг