Улстөрийн синдром хуулийн байгууллагын нүд, чихийг таглаж, сэтгэл зүрхийг худалдаад авчихсан гэх хатуу үгийг өнгөрсөн долоо хоногийн болсон үйл явдлаас харж болохоор байлаа.
2008 оны долдугаар сарын 1-ний үймээний үеэр дөрвөн иргэн буудуулан амиа алдаж, олон зуун залуус гэмт хэрэгтэн болж шүүхээр шийтгүүлсэн. Энэ бүхний буруутанг хайж гурван жил гаруй болсны эцэст тухайн үед үүрэг гүйцэтгэсэн цагдаагийн байгууллагын удирдлагуудыг шүүхийн танхимд авчирлаа.
Сүхбаатар дүүргийн шүүхийн гадна цагдаагийн байгууллагын албан хаагчид, ар гэрийнхэн цуглаж эсэргүүцлээ илэрхийлэн энэ хэргийн анхнаас нь буруу шүүж байна. Үймээний анх санаачилсан О.Магнай, Б.Жаргалсайхан, Ж.Батзандан нар цагаадчихаад албан тушаал хөөж явахад эгэл жирийн үүрэг гүйцэтгэсэн цагдаагийн удирдлага, албан хаагчдыг буруутгаж байгааг эсэргүүцэж байна. Үнэхээр шүүхээр шийдэх гэж байгаа бол үймээний өдөөсөн, турхирсан дээрх этгээдүүдийг адилхан энд авчир. Мөн тухайн үеийн Үндэсний аюулгүй байдлын зөвлөлийн гишүүдийг ч дуудан оролцулах хэрэгтэй гэсэн шаардлагыг тавьж байсан.
Үймээнд оролцсон дөрвөн иргэн амиа алдсан тухай ярьдаг ч үүнийг зохицуулахаар үүрэг гүйцэтгэж байгаад амиа алдсан хоёр, гэмтэж бэртэн үүрэг гүйцэтгэх чадваргүй болсон олон арван цагдаагийн албан хаагчдын тухай нэг ч үг хэлэхгүй байгааг мөн тэд эсэргүүцэж байлаа. Төр цагдаагийн албан хаагчдаа ард түмнийхээ эсрэг ашиглаж, хэрэглээд хаядаг татсан тамхины иш шиг үзэж байгаад гомдолтой байсан юм. Энэ бүхний эцэст прокурор, шүүхийнхэн цагдаагийн байгууллагын эсрэг мэдэгдэл хийж биеэ өмөөрч, арьсаа хамгаалж эхэлсэн. Хэвлэлийн хуудсаар мэдэгдэл нийтлүүлж хэсэг бүлгээрээ хэвлэлийн хурал хийлгээд хуулийн байгууллагад улс хэр шургалсныг харуулсан.
Ийнхүү хуулийн толхилцож улстөржиж биеэ өмөөрч байхад орон сууцтай болчих гэсэн жирийн иргэд барилгын компани, Орон сууц санхүүжилтын корпорацийн хооронд тавхайгаа эргэтэл зүтгэнэ. Өмнө нь аав ээжийнхээ орон сууцыг хамтран эзэмшигч байсан байна, орлого чинь хүрэхгүй, бичиг баримт дутуу гэсэн хэлж болох олон арван шалтгаанд барьцаалагдсан иргэдийн бага хүүтэй зээлээр тохилог орон сууцтай болох иргэдийн мөрөөдөл тас татагдан хаягдаж байлаа.
Аралын оронд айлчлаад ирсэн Ерөнхий сайд Хөгжлийн банк үнэт цаас гаргасан тухай мэдээлэл байв. 10 сарын өмнө үүдээ нээж байсан тус банк өнөөдөр олон улсын санхүүгийн зах зээлд 5 жилийн хугацаатай 580 сая ам.долларын үнэт цаас гаргаж, Монгол улс жишиг хүүгийнхээ түвшинг амжилттай тогтоосон явдал юм. Хөгжлийн банкны энэхүү үнэт цаас нь 5.75 хувийн хүүтэй байх ажээ. 300 гаруй хөрөнгө оруулагчдаас 6.25 тэрбум ам.долларын захиалга авч, энэ нь гаргах хэмжээнээс 12 дахин их байсан төдийгүй олон улсад нэр хүнд бүхий хөрөнгө оруулалтын банк, санхүүгийн мэдээллийн агентлагууд Хөгжлийн банкны үнэт цаасны энэхүү арилжааг сүүлийн жилүүдэд хийгдсэн хамгийн амжилттай арилжаа хэмээн үзэж байгаа.
Ийнхүү үнэт цаас гаргаснаар томоохон бүтээн байгуулалтууд болох шинэ төмөр зам, авто зам, Сайншандын аж үйлдвэрийн цогцолбор, 100 мянган айлын орон сууцны хөтөлбөртэй холбоотой төслүүдийн санхүүжилт хийх бололцоотой болж байгаа гэнэ. Чухам ямар төслүүдийг, яаж санхүүжүүлэх талаар энэ долоо хоногийн Засгийн газар хуралдаанаараа хэлэлцэж, иргэддээ нээлттэй мэдээлнэ хэмээн найдвар төрүүлсэн мэдээллийг өглөө.
Мөн Засгийн газрын хуралдаанаар төрийн албан хаагчдын цалин, тэтгэврийн хэмжээг шинэчлэн тогоолоо. Төрийн албан хаагчдын цалинг хоёрдугаар сарын 1-ний өдрөөс тооцон эхний ээлжинд 80 мянган төгрөгөөр, тавдугаар сарын 1-ний өдрөөс 23 хувиар нэмэхээр Засгийн газрын хуралдаанаас шийдвэрлэлээ. Ингэснээр төрийн албан хаагчдын дундаж цалин 630 мянган төгрөгт хүрч байна. Засгийн газрын 2008-2012 оны үйл ажиллаганы мөрийн хөтөлбөрт тусгасны дагуу төрийн албан хаагчдын цалинг 2008 онд 20 хувиар, 2010 онд 30 хувиар нэмсэн бөгөөд өнгөрсөн оны байдлаар дундаж цалин 410 мянган төгрөг байгаа юм. Харин Нийгмийн даатгалын сангаас олгож байгаа тэтгэврийн хэмжээг 35 мянган төгрөгөөр нэмэн энэ оны хоёрдугаар сарын 1-ний өдрөөс эхлэн тооцож олгохыг Засгийн газрын хуралдаанаас Нийгмийн хамгаалал, хөдөлмөрийн болон Сангийн сайд нарт даалгалаа.
Ингэснээр 318,2 мянган тэтгэвэр авагчийн тэтгэвэр нэмэгдэж байгаа бөгөөд дундаж тэтгэвэр 27,8 хувиар нэмэгдэж 162 мянган төгрөг болж байна. Нийгмийн даатгалын сангаас олгох бүрэн тэтгэврийн доод хэмжээг 140 мянга 300 төгрөгөөр, хувь тэнцүүлэн тогтоосон тэтгэврийн доод хэмжээг 105 мянга 200 төгрөгөөр шинэчлэн тогтоож хоёрдугаар сарын 1-ний өдрөөс мөрдөхөөр болсон байна. Тавдугаар сарын 1-нээс дахин нэмснээр тэтгэвэр энэ онд 53,8 хувиар, 2008 оныхоос 2 дахин нэмэгдэнэ.