ЭМЯ, Мянганы сорилтын сан хамтраад дөрвөн чиглэлээр үзлэг зохион байгуулж байна. Үүнд умай болон хөхний хавдар, цусны даралт, чихрийн шижин гэсэн өвчлөлийн оношлогоог хийх аж.
Тус үзлэгт 30-60 насны эмэгтэйчүүдийг хамруулах юм байна. Ингэхдээ эмэгтэйчүүдийг гурван жилийн давтамжтай хамруулах гэнэ. 30, 33, 36 гэсэн давтамжаар явах бөгөөд 32 настай бол ирэх жил нь хамрагдах боломжтой. Энэ чиглэлээр үзлэг оношлогоо хийх эмч мэргэжилтнүүд бэлтгэгдэж буй бөгөөд үзлэг хийхэд шаардлагатай тоног төхөөрөмжийг хангах ажил үргэлжилж байгаа юм.
Үзлэг ирэх сарын 7-нд эхлэнэ. Үзлэгт хамрагдах насны эмэгтэйчүүд хичнээн байгааг орон нутаг бүрт тооцоо судалгаа гаргах ажил эхэлсэн байна. Өнгөрсөн жил “Хавдрын эсрэг үндэсний аян” –ы хүрээнд дээрх дөрвөн чиглэлээр үзлэг оношлогоо явагдсан. ДЭМБ-ын тодорхойлсноор умайн хүзүүний хорт хавдар эмэгтэйчүүдийн хувьд хамгийн аюултай хавдарт тооцогддог. 35-55 насныхан өртөх магадлал өндөр аж.
Уг хавдраар жилд дэлхийн хэмжээнд 470 мянган эмэгтэй шинээр бүртгэгддэг байна. Тэдний 233 мянга нь нас бардаг судалгаа гарчээ.
С.Жигүүр