Нийслэлийн иргэдийн бухимдлыг хамгийн ихээр төрүүлдэг нэг асуудал замын бөглөрөл. Замын хөдөлгөөний ачааллыг тэнцвэржүүлэх, түгжрэлийг бууруулах талаар иргэдээс ирүүлсэн санал хүсэлтийн дагуу нийслэлийн Засаг дарга зарим худалдааны төв, захын ажиллах хуваарьт өөрчлөлт оруулсан билээ.
Үүнд замын дагуу байрлах худалдаа үйлчилгээний газар, худалдааны төв, зах, барилгын материал, автомашин техник худалдаа, үйлчилгээ, засварын газруудыг хамаатуулан энэ сарын 26-ны өдрөөс эхлэн мөрдөхөөр болсон юм. Энэхүү цагийн хуваарийн өөрчлөлт оруулсан захирамжид Сандэй худалдааны төвийг 08.00-17.00 цагийн хооронд ажиллана хэмээн оруулсан аж.
Харин уг асуудалд Сандэй худалдааны төвийн түрээслэгчид өнөөдөр Монгол ньюс мэдээллийн төвд эсэргүүцлээ илэрхийлж, иргэдийн худалдан авалтын хамгийн оргил цагт хаах шийдвэр гаргасан нь тэдний эрхийг зөрчиж байна хэмээн мэдэгдлээ. Хотын даргын замын хөдөлгөөний бөглөрөлийг арилгах асуудлыг шийдэх ажлыг эхлүүлснийг буруутгаагүй. Өөр боломжтой хувилбарууд ч олон бий.
Гэтэл Сандэй худалдааны төвийн 800 гаруй түрээслэгч, тэдний гэр бүлийн эрх ашгийг зөрчиж байна. Мөн энэ шийдвэр нь хууль эрх зүйн ямар ч үндэслэлгүй тул тус худалдаааны төвийн ажиллаха цагийн хуваарийг эргэн нэг харахыг хүсч байгаагаа илэрхийлэв.
П.Наран