Монгол Улсын Ерөнхийлөгч Ц.Элбэгдорж Бүгд Найрамдах Киргиз Улсад хийж буй албан ёсны айлчлалынхаа гурав дахь өдөр тус улсын Иссык Куль мужид очжээ. Энэ өдөр Ерөнхийлөгч Ц.Элбэгдорж “Суйунбек” хэмээх шувууны аж ахуйн үйл ажиллагаатай танилцаж, нутгийн малчин айлаар зочилсон байна.
Тус мужид Увс аймгийн Хяргас сумын Засаг дарга, Иссык Куль мужийн захирагч нар уулзаж, хамтран ажиллах талаар ярилцаж, хамтран ажиллах тухай санамж бичигт засаг дарга, захирагч нар гарын үсэг зуржээ.
Мөн Иссык Куль мужид амьдардаг халимаг гаралтай иргэдийн төлөөлөгчидтэй Ерөнхийлөгч уулзсан байна. Тэд өөрсдийгөө 340 гаруй жилийн өмнө монгол нутгаас гарч шинжаанаар дамжин энэ нутагт ирсэн, одоо тэдний 5-6 дахь үеийнхэн амьдарч байгаа хэмээн танилцуулж, мал аж ахуй эрхэлж амьдардаг тул монголчуудтай холбоо тогтоож мал аж ахуйгаа сайжруулахад дэмжлэг авах, хамтарсан аж ахуй эрхлэх сонирхолтой байгаагаа илэрхийлжээ.
Д.Цэцэг