Санхүүгийн Зохицуулах Хорооноос жил бүр оны  “Шилдэг даатгалын компани“ шалгаруулдаг уламжлалтай. Энэ жилийн шалгаруулалтанд 17 компаниас 2011 оны “Шилдэг даатгалын компани”-аар “Монгол даатгал” ХХК тодорч өргөмжлөл гардан авлаа. Уг шалгаруулалтыг явуулахдаа хууль журам баримтлан даатгуулагчдын эрх ашгийг дээдлэн ажилласан байдал, нөхөн төлбөр олголтын түвшин болон санхүүгийн шалгуур үзүүлэлтүүдийг хангаж ажилласан зэргээр нь харьцуулан дүгнэдэг юм. “Монгол даатгал” ХХК нь 1934 оноос үйл ажиллагаа явуулж байгаа даатгалын тэргүүлэгч компани бөгөөд 2011 онд нийт 8815 даатгуулагч хувь хүн, хуулийн этгээдэд 3,4 тэрбум төгрөгийн нөхөн төлбөр олгосон нь даатгалын зах зээлийн 33,3 хувийг эзэлж байна. “Монгол даатгал” ХХК нь дуудлагын даатгал, олон улсад үйлчлэх эрүүл мэндийн даатгал,  уул уурхайд ашиглагдах хүнд даацын машин, механизмийн цогц даатгал, харилцагчийн эрсдэлийн үнэлгээг хийх, эрсдлийн түвшинг тогтоох зэргээр шинэлэг бүтээгдэхүүн, үйлчилгээг 2011 онд даатгалын зах зээлд шинээр нэвтрүүлсэн нь олны таашаалыг хүлээгээд байгаа билээ.