“Хуульчийн эрх зүйн байдлын тухай” хуулийн төслийн хэлэлцүүлэг Иргэний танхимд зохион байгуулагдаж нийслэл, дүүргийн шүүх, прокурорын байгууллагын шүүгч, прокурор нар оролцлоо. Уг хуулийн хэлэлцүүлгийг цувралаар зохион байгуулж байгаа ба өмнө нь өмгөөлөгчдийн дунд зохион байгуулсан болно. Хэлэлцүүлэгт УИХ-ын гишүүн Х.Тэмүүжин, Ерөнхийлөгчийн ахлах зөвлөх П.Цагаан, Ерөнхийлөгчийн хуулийн бодлогын туслах Ж. Баярцэцэг оролцож хуулийн төслийг танилцууллаа.  “Хуульчийн эрх зүйн байдлын тухай” хуулийн төсөл нь Монгол Улсын Ерөнхийлөгчийн өргөн барьж буй шүүхийн шинэтгэлийн багц хуулийн төслүүдийн нэг бөгөөд хуулийн мэргэжил, түүний хариуцлага, мэргэжлийн өөрөө удирдах ёс зэрэг хууль зүйн дэд бүтцийг тодорхойлж, зохицуулах зорилготой юм. Хуулийн төсөл нь хуульчийн мэргэжлийн шалгалт авах журам, хуульчийн лиценз, мэргэжлийн хариуцлагыг шинээр тодорхойлж, шүүгч, прокурор, өмгөөлөгчийг эгнээндээ нэгтгэсэн Хуульчдын Танхимыг бий болгох талаар тусгасан. Хэлэлцүүлэгт оролцогчид идэвхтэй оролцож,  саналаа илэрхийлсэн. Хэлэлцүүлгээс гарсан саналыг хуулийн төсөлд тусгаж,улам боловсронгуй болгох талаар хуулийн ажлын хэсэг ажиллах болно.