“Алтайн хүдэр” ХХК-ийн ажилтнууд өнөөдөр Зууны мэдээ сонины хэвлэл мэдээллийн танхимд Өнөөдөр сонинтой холбоотой асуудлаар хэвлэлийн бага хурал хийлээ. Тус компаниас өгч буй мэдээллээр Өнөөдөр сонины энэ оны дөрөвдүгээр сарын 09-ний өдрийн дугаарын эхний нүүрэнд нийтлэгдсэн “Алтайн хүдэр компанид ажиллахаар ирсэн Унгар улсын иргэн амь насаа алджээ” гэсэн гарчигтай нийтлэл нь манай компанийн нэр төрд халдсан ташаа мэдээлэл юм гэв.
Тодруулбал Өнөөдөр сонины нийтлэлд бичигдсэн “Өдөрт 14-15 цаг ажиллаж тохь тухгүй орчинд ажиллаж амьдарч байсан бөгөөд амласан цалингаа ч өгдөггүй байсан “ гэсэн өгүүлбэр нь ташаа. Түүнчлэн хүйтэн байранд барилгын хавтангаар наар маягын ор засаж гадаад дотоодын ажилтнаа байрлуулж байсан, талийгаачийг амь насаа алдсаны дараа уурхайд эмч нар очиж гадаад дотоодын ажилчдыг эмнэлгийн үзлэгт хамруулсан бөгөөд бүх хүний эрүүл мэнд тааруу хоол хүнсээр дутмаг байсан гэх зэргээр гүтгэлгийн шинжтэй мэдээлэл цацсанд туйлын харуусч байгаагаа илэрхийллээ.
Иймээс тус компанийн ажилтнууд Өнөөдөр сонинг гүтгэлгийн шинжтэй дээрх нийтлэлдээ тав хоногийн дотор залруулга хийж сонины эхний нүүрэнд нийтлэхийг шаардаж байна гэв. Хэрэв энэхүү шаардлагыг тогтоосон хугацааны дагуу эргэн нийтлэхгүй бол компанийн нэр хүндэд халдсан бодит хохирол болох 8-9 тэрбум төгрөгийг Өнөөдөр сониноос нэхэмжлэх болсноо мэдэгдсэн байна. Дашрамд дурдахад хуралд оролцогчид сэтгүүлчдийн нэг ч асуултад хариулахгүй гэдгээ хурлын өмнө мэдэгдсэн юм.
Н.Бүжин