Найрамдлаар овоглосон Дархан хот байгуулагдсаны түүхт 50 жилийн ойн өдрийг тохиолдуулан төрөлх хотынхоо хөгжлийн түүхийг бичилцэж яваа эрхэм танд баярын мэнд хүргэхийн ялдамд эрүүл энх, аз жаргал, урт удаан наслахын өлзийтэй ерөөлийг өргөн дэвшүүлье.

Одоогоос 50 жилийн тэртээ 1961 оны 10 дугаар сарын 17-ны өдөр Давхарын төмөр замын жижиг станцын дэргэд барилгын материалын баялаг түүхий эдийн орд газрыг түшиглэн Дархан хотын суурийг анх тавьсан түүхтэй билээ.

Монгол улс НҮБ-д элсэж байсан тэртээх он жилүүдэд дэлхийн бүү хэл эх орныхоо газрын зурагт ч нэр нь тэмдэглэгдээгүй Дархан хот өнөөдөр найдвартай баталгаатай эрчим хүчний хангамж, дэд бүтцийн хөгжлөөрөө Монгол улсад тэргүүлж, эрүүл мэнд, боловсрол, соёл, шинжлэх ухаан, аж үйлдвэр, худалдаа үйлчилгээ, хөдөө аж ахуй зэрэг нийгэм соёлын бүх салбар хөгжсөн том хотын нэг боллоо. Хүний амьдралын ахархан хугацаатай тэнцэх энэ 50жилийн хугацаанд Дархан-Уул аймаг маань өөрсдийн бүтээлч, хөдөлмөрч хамт олны дотроос Монгол улсын Хөдөлмөрийн баатар 17, Гавьяат цолтон 42, Төрийн соёрхолт 6-г төрүүлсэн нь өнөөгийн Дархан-Уул аймгийнханы зүй  ёсны бахархал болж байдаг.

Та бүхний хичээл зүтгэл, төрөлх хотынхоо төлөө гэсэн сэтгэл зүрх, нөр их хөдөрмөрөөр богино хугацаанд сүндэрлэн боссон Дархан хот өнөөдөр Монгол улсын эдийн засаг, нийгмийн хоёрдогч томоохон хот болон хөгжиж чадсан нь Дарханчуудын бахархал билээ. Хотын маань нэр хүнд Монгол улсад төдийгүй гадаад олон оронд найрамдал хамтын ажиллагаа, ах дүүгийн харилцаагаар тодорхойлогдож дэлхийд нэрлэгдэх хот болж чадлаа.

Төр, иргэдийн холбоо улам бэхжиж, түмэн олны маань үйлс өөдрөг байж, хамтын хүч, хамтын бодол санаа, хамтын хөдөлмөрийн үр шим нь иргэн бүрийн заяаг түшиж, айл бүхэнд аз жаргал авчрах болтугай. Дархан хот маань үеийн үед цэцэглэн хөгжих болтугай.

Дархан-Уул аймгийн ИТХ-ын дарга   Л.Гүнчин Засаг дарга Г.Эрдэнэбат