Шууд.мн сайтын редакцаас “Төрийн хүн” сэдвийн хүрээнд  төр, засагт ажиллаж буй албан хаагчид ямар хүн байх ёстой вэ гэсэн асуултад уншигчдын байр суурийг сонслоо.

 Ж.Лхамсүрэн / Сүхбаатар дүүргийн иргэн/

Төрийн байгууллагад ажиллаж буй хүнийг л төрийн хүн гэнэ шүү дээ. Тэгэхээр төр гэдэг бол ард түмэн. Ард түмнийг төлөөлөн ажиллаж буй байгууллага болохоор олон нийтийн хүсэл эрмэлзлэлийг биелүүлдэг, шударга хүн байх ёстой гэж бодож байна. Түүнээс цаашхи олон янзын үйл ажиллагаандаа  үзэл бодол нь шингэж  явах учиртай.

Х.Мэндсайхан/ Баянгол дүүргийн иргэн/

Төрийн  хүн хууль дүрмээ сахидаг байх хэрэгтэй. Монголд өнөөдөр төрийн албан хаагч шударга ажиллаж  байна уу гэдэг асуултад хариулахад харьцангүй ойлголт. Үнэхээр ард түмний сайн сайхны төлөө хоёргүй сэтгэлээр зүтгэж яваа нэгэн байхад, авлига авдаг нь олон бий. Төр бол иргэдэд үйлчилдэг байгууллага. Тэр утгаараа соёлтой, шуурхай шударга үйлчилдэг албан хаагчид ажиллах хэрэгтэй. Олон хүн сайнтай муутай, ой мод урттай богинотой гэдэг шиг төрийн төлөө үнэнч шударгаар бүх насаараа зүтгэсэн олон сайхан хүн бий.  Төрийн хүний ганц жишээ татахад миний мэдэхээр Захиргааны хэргийн шүүхэд  н.Зоригтбаатар гэдэг шүүгч бий. Үнэхээр шударга, ажлаа хуулийн дагуу явуулдаг хүн  байна лээ. Энэ мэт олон албан хаагчид бий гэдэгт итгэж байна.

Б.Дөлгөөн/ Баянзүрх дүүргийн иргэн/

Ард түмний төлөөлөл, үйлчлэгч байх ёстой. Их бага ямар ч ажилд сэтгэлээсээ ханддаг. Таны өмнө хүлээсэн үүргээ хариуцлагатай биелүүлдэг тийм л хүн байх ёстой юм болов уу гэж бодож байна. Гэтэл төрийн албанд очсон л бол эрх ямба эдэлж иргэдэд биш танил тал, намд үйлчилдэг төрийн албан хаагч олон болсонд сэтгэл эмзэглэж явдаг. Үйл ажиллагаа нь сонирхлын зөрчилтэй байна. Хараат байна. Шударга ёсыг сахихгүй байна.  Уг нь бол иргэдийн төлөө, нийтийн эрх ашгийг дээдэлдэг,  хуулиа сахидаг  байвал аяндаа л улс хөгжинө шүү дээ.

Г.Бум-Эрдэнэ /Сүхбаатар дүүргийн иргэн/

Миний бодлоор төр ард түмэн. Төрийн хүн ард түмэнд үйлчилгээ үзүүлэх ёстой. Улс эх орноо авч явах ёстой. Хамгийн чухал нь улс орноо гэсэн сэтгэлтэй  хүн байх ёстой. Чин сэтгэлтэй хүн л байна даа. Төрд алба хашиж буй олон хүн бий. Жишээлбэл Л.Гантөмөр гишүүнийг онцолмоор байна.

 Б.Сувд / Баянзүрх дүүргийн иргэн/

Төрийн хүн гэхээр УИХ-ын гишүүн, дарга сайд  байх ёстой гэсэн буруу ойлголт байна уу гэж боддог юм.  Баг, хороо, дүүрэгт ажиллаж буй нийгмийн, халамжийн ажилтнууд бий. Тэднийг төрийн хүн гэж хэлмээр санагдаж байна. Тэдэнд баярлалаа гэж хэлье. Хүмүүсийн сайн сайхны төлөө бага гэхгүй олон.

Д. Раднаабазар /Чингэлтэй дүүргийн иргэн/

Хүнд сурталгүй байх хэрэгтэй. Өчүүхэн зүйлээр арга саам хийдэг байх хэрэггүй болов уу. Хууль сахьдаг байх хэрэгтэй. Төрд ажиллаж байгаа нийгмийн, халамжийн, хорооны ажилтнууд олон бий. Тэдэнд баярлалаа гэж хэлмээр байна.

Э.Бат-Отгон  /Сонгинохайрхан дүүргийн иргэн/

Төрийн албан хаагч хүн иргэдийнхээ төлөө ажиллаж чаддаг. Ноён нуруутай, боловсролтой хүнийг хэлэх болов уу. Миний эмээ байна. Хавдар судлалын төвд олон жил эмнэлэгт мэс заслын эмчээр Н.Цэрэндолгор 40 жил ажиллаж байна. Анх л  сургуулиа төгсөөд очсон. Миний эмээ жинхэнэ төрийн хүн дээ.

Н.Түвшин