БНСУ-ын  КОЙКА (Солонгосын олон улсын хамтын ажиллагааны байгууллага) 4 сая ам.долларын өртөг бүхий буцалтгүй тусламжийн хүрээнд “Улсын бүртгэл, мэдээллийн нэгдсэн системийг сайжруулах Цахим архив” төслийг Улсын бүртгэлийн ерөнхий газарт хэрэгжүүлж эхлээд байгаа билээ.

 Тэгвэл өнөөдөр Олон улсын Койка байгууллагаас  “Улсын бүртгэл, мэдээллийн нэгдсэн системийг сайжруулах Цахим архив”  төслийн  хүрээнд хийсэн систем, хуулийн этгээдийн бүртгэлийн шинэ систем болон тус газрын  дотоод хэрэгцээний портал системийн цогц программ хангамж, холбогдох мэдээллийн технологийн тоног төхөөрөмж, сервер, программ хангамжийн бүрдлийг тус газарт хүлээлгэж өгөх тууз хайчлах ёслолын арга хэмжээ боллоо.

 Еслолын ажиллагаанд ХЗДХ-ийн дэд сайд Н.Удвал , Улсын бүртгэлийн ерөнхий газрын дарга Л.Амарсанаа, БНСУ-аас Монгол Улсад суугаа Онц бөгөөд бүрэн эрхт Элчин сайд Ли Тэ Ру болон албаны зарим хүмүүс оролцлоо.

Уг  төсөл хэрэгжсэнээр тус газрын архивт хадгалагдаж байгаа цаасанд суурилсан 14 мянга гаруй архивын хадгаламжийн нэгжийг цахим буюу дижитал хэлбэрт  шилжүүлж,  нэгдсэн мэдээллийн санд байршуулах, улмаар улсын бүртгэлийн сан болох иргэн, хуулийн этгээд, эд хөрөнгийн эрхийн бүртгэлийг системтэйгээр удирдах нэгдсэн сүлжээ, програм хангамж, мэдээллийн сан бүхий орчин үеийн цахим архивыг бий болгох юм. Түүнчлэн  иргэдэд хүрэх бүртгэлийн үйлчилгээ хүртээмжтэй, шуурхай болж гар аргаар хайлт хийх, иргэдийн мэдээллийг олон сангаас хайх шаардлагагүй болох, цаасан бүртгэлийг багасгах, цахим архивын мэдээллийг онлайнаар авдаг болох зэрэг олон чухал давуу талтай.

Түүнчлэн  3 төрлийн архивын бүртгэлийн мэдээллийг нэг зэрэг ашиглах боломж бүрдэж байгаагаараа ихээхэн ач холбогдолтой. Өөрөөр хэлбэл иргэд цаг хугацаа орон зайнаас үл хамааран хуулийн этгээдийн болон иргэний гэр бүлийн 8-н төрлийн лавлагаа болох төрсний, үрчлэлт, гэрлэсний, гэрлэлт цуцлалтын, овог нэр өөрчилсний зэрэг эдгээр лавлагааг авахдаа тухайн оршин суугаа газраасаа шууд цахимаар авах бүрэн боломжтой болох юм.

Төслийн гүйцэтгэгчээр нь Солонгосын “Эс Кэй Си энд Си” компани ажиллаж байна. Төслийн зүгээс төслийг хэрэгжүүлэх ажлын хүрээнд цахим хэлбэрт оруулахад шаардлагатай компьютер тоног төхөөрөмж, бараа материал, программ хангамж бусад дагалдах хэрэгсэл, ширээ сандал, зэргийг бэлтгэж эхний ээлжинд нийлүүлээд байна. Мөн төслийн хүрээнд өнөөдрийн хүлээлгэн өгч байгаа шинэ систем, программ хангамжийг ажиллуулах, ашиглалт үйлчилгээг хариуцан ажиллах хүмүүсийг мэргэшүүлэх, дадлагажуулах зорилгоор Солонгос улсад холбогдох сургалтанд хамруулаад байна.

Улсын бүртгэлийн ерөнхий газар Монгол Улсын Мянганы хөгжлийн зорилтод суурилсан Үндэсний хөгжлийн цогц бодлого,  Монгол Улсын Засгийн газрын 2008-2012 оны үйл ажиллагааны  хөтөлбөр болон Монгол Улсад бүртгэл, мэдээллийн нэгдсэн тогтолцоог бий болгох үндэсний хөтөлбөрийг хэрэгжүүлэх ажлын хүрээнд  Улсын бүртгэлийн хууль, эрх зүйн орчинг боловсронгуй болгох, үйлчилгээний үнэ хураамж, шат дамжлагыг багасгах, бүртгэл, мэдээллийн бааз суурийг бэхжүүлэх чиглэлээр томоохон арга хэмжээнүүдийг үе шаттайгаар авч хэрэгжүүлээд байгаа билээ. Үүний нэг нь Монгол Улсад Бүртгэл мэдээллийн нэгдсэн тогтолцоог бий болгох үндэсний хөтөлбөрийн хүрээнд  БНСУ-ын Олон Улсын KOICA-гаас 4 сая америк долларын буцалтгүй тусламжаар санхүүжүүлж буй “Улсын бүртгэл, мэдээллийн нэгдсэн системийг сайжруулах Цахим архивын төсөл”-ийг  хэрэгжүүлж эхлээд байгаа нь томоохон дэвшил юм байна.