Засгийн газрын өнөөдрийн хуралдаанаар МУИС-ийг Судалгааны их сургууль болгох талаар гишүүн Д.Лүндээжанцан нарын санаачлан боловсруулсан УИХ-ын тогтоолын төслийг зарчмын хувьд дэмжлээ. Судалгааны их сургууль болгохын тулд эрх зүй, дэд бүтэц, боловсон хүчин, санхүүгийн орчин бий болгож, МУИС-ийн бие даасан байдлыг бэхжүүлэх, шаардлагатай удирдлага, зохион байгуулалтын тогтолцоог бүрдүүлэн, судалгааг хөгжүүлэх зорилтыг хэрэгжүүлэх ёстой юм байна. Мөн Монгол Улсын Засгийн газар, Японы олон улсын хамтын ажиллагааны банк хооронд байгуулах Зээлийн хэлэлцээрийн төслийг зарчмын хувьд дэмжиж, УИХ-ын холбогдох Байнгын хороотой зөвшилцөхөөр боллоо. Хэлэлцээрийн дагуу Японоос таван тэрбум хүртэл иений зээлийг авч ашиглах боломжтой. Зээлийг уул уурхай, дэд бүтэц, хөдөө аж ахуй, эдийн засгийн бусад салбарын хөгжлийг дэмжих зорилгоор дотоодын үйлдвэрлэгч, аж ахуйн нэгжээс гаргасан төслийг санхүүжүүлэхээр урьдчилан тохиролцоод байна. У.Жигүүр