Олимпийн наадмын эрэгтэйчүүдийн 100 метрийн гүйлтийн тэмцээний үеэр нэгэн үзэгч усны сав шидэж танхайрсан хэрэг гарсан билээ. Тэгвэл тухайн үед болсон явдлаас нэмэлт мэдээлэл хүргье. Сав шидсэн этгээдийн хажууд тохиолдлоор нидерландын жудочин Эдит Бош байж таарсан байна. Тэрээр өнгөрсөн долоо хоногт эмэгтэйчүүдийн 70 кг-ийн жинд хүрэл медаль хүртсэн нэгэн юм. Эдит өөрөө тамирчин мөн спортын хөгжөөн дэмжигч учир хөгжөөн дэмжигчид Олимпод оролцож байгаа тамирчдаа хүндлэх ёстой гэж үздэг гэнэ. Тэрээр сав шидсэн этгээдийг хүчтэй түлхээд “Чи чинь галзуу юм уу?” хэмээн хэлснээ ярьжээ. Энэ хэрэг явдлаас болж Эдит Ямайкийн тамирчин Усейн Болтын түрүүлэхийг харж чадаагүй гэнэ. “Би спортын фен учраас л хариу үйлдэл хийсэн юм” хэмээн Эдит хэлсэн байна. Хэргийг үйлдсэн хүнийг Эшли Гилл-Веб гэдэг ба түүнийг батлан даалтын мөнгө өгч, наадам дуустал дахин олимпийн стадион руу ойртохгүй байх болзолтойгоор суллажээ. Ц.Мишээл