Монгол Улсын төрийн албан хаагчдын боловсрол, мэдлэг чадварыг дээшлүүлэх чиглэлээр хамтран ажиллахаар Төрийн албаны зөвлөлийн дарга Д.Зүмбэрэллхам, "MIU" дээд сургуулийн захирал Куонн У Мүнн нар Санамж бичигт гарын үсэг зурлаа.
Санамж бичгийн хүрээнд төрийн албан хаагчдын гадаад хэлний мэдлэгийг дээшлүүлэхэд англи хэлний ахисан түвшний болон богино хугацааны эрчимжүүлсэн сертификаттай сургалт зохион байгуулахын зэрэгцээ Төрийн удирдлагын чиглэлээр магистрт суралцуулах, "MIU" дээд сургуулийн хамтын ажиллагаатай гадаад орнуудын их дээд сургуулиудад оюутан солилцоогоор богино хугацааны хөнгөлөлттэй, тэтгэлэгт сургалтын хөтөлбөрүүдэд хамруулах юм.
Мөн Төрийн албаны шинэтгэлийн талаар олон улсын туршлага судлах бага хурал, семинар, симпозиум зэргийг хамтран зохион байгуулахаар тохиролцлоо.
Магадлан итгэмжлэгдсэн "MIU" дээд сургууль нь Монгол улсад 2002 оноос үйл ажиллагаагаа эхэлсэн бөгөөд АНУ дахь Труманы нэрэмжит Төрийн удирдлагын сургууль " University of Missouri Columbia, БНСУ-ын "Korea university " зэрэг их сургуулиудтай хамтран Төрийн удирдлагын магистрын хөтөлбөрийг хамтран хэрэгжүүлдэг аж.