Яаралтай түргэн тусламжийн машин удаж ирдэг гэх хүн олон байдаг. Энэ бол үнэхээр чухал асуудал. Эрүүл мэндийн дэд сайд Ж. Амарсанаа яаралтай тусламжийг түргэсгэх болон зам тээврийн ослыг бууруулах арга замын талаар Замын цагдаагийн газрын дарга Ж.Буянбат, ЯТТТ -ийн дарга Ц.Пүрэвдаш нарыг хүлээн авч уулзсан байна.
Энэ үеэр ЗЦГ-ын дарга Ж.Буянбат “Түргэний машиныг хурдан явуулах боломжтой. Түргэний машин дуут дохиогоо ажиллуулан замын хөдөлгөөнд оролцож байгаа тохиолдолд зам тавьж өгөхгүй эсвэл санаатай саад болж байгаа жолооч нарын эрхийг хасахаар болсон” гэв.
Дэд сайд Ж.Амарсанаа Замын цагдаагийн газрын даргын хүсэлтийг хүлээн авч Эрүүл мэндийн яам, Замын цагдаагийн газар хамтран 2013 онд багтаан нийт замын цагдаагийн ажилчдын гуравны нэгийг яаралтай тусламжийн сургалтад хамруулахаар болсон байна. Цаашид түргэн тусламжийг 20 минутад биш 10 минутад иргэдэд хүрдэг болгох зорилтыг дэвшүүлэн ажиллах хэрэгтэйг онцолсон юм.
emch.mn