Арванхоёрдугаар сарын 21-нд “галав юүлнэ” гэсэн цуу яриа тарааж байсан дор хаяад 93 хүнийг Хятадад баривчилсан байна. Тус орны хэд хэдэн мужид баривчилгаа явуулсныг эндхийн олон нийтийн мэдээллийн хэрэгслийн мэдээг иш татан “Телеграф” сонинд бичжээ. Худал мэдээ тарааж байна гэж тэднийг буруутгаж байгаа аж.
Баривчлагдсан хүмүүс чанга яригч ашиглаж, мөн арванхоёрдугаар сарын 21-нд нар гурван алга болж, гэрэл цахилгаан тасарч, үүнээс болоод дэлхийд тас харанхуй болно гэж бичсэн ухуулах хуудас тарааж байжээ. Зарим мэдээгээр, баривчлагдсан хүмүүсийн дотор БНХАУ-д үйл ажиллагаа явуулахыг нь хориглосон “Төгс хүчит бурхан” гэдэг байгууллагын гишүүд байгаа ажээ. Тус байгууллагын идэвхитнүүдийг эрх баригч ХКН-ыг түлхэн унагаахыг уриалдаг гэж буруутгадаг юм.
“Галав юүлэхээс” айж байгаа нь арванхоёрдугаар сарын 14-нд Хэнань мужийн бага сургуулийн сурагчдад халдах шалтгаан болсон гэж Хятадын цагдаагийн байгууллага үзэж байгаа ажээ. Хутга барьсан нэг эр 22 хүүхэд, хажуугаар явж байсан нэг хүнийг хутгалж, шархдуулсан юм.
С.Золбоо