МАН-ын УЗ-ийн гишүүд болон Бага хурлын гишүүд намынхаа шинэчлэл, хяналтын асуудлаар мэдээлэл хийлээ. Монгол ньюс мэдээллийн төвд зохиогдсон  уг хэвлэлийн хуралд МАН-ын Удирдах зөвлөлийн гишүүн Р.Рааш, Д.Загджав, Бага хурлын гишүүн Т.Аюурсайхан, Б.Ганхуяг болон тус намын залуу гишүүд оролцсон юм. Хурлыг МАН-ын Удирдах зөвлөлийн гишүүн Д.Загджав эхлүүлсэн бөгөөд МАН-ын удирдах зөвлөлийг шинэчилж, намын дотоод ардчилалыг хууль дүрмийн хүрээнд үндсээр нь өөрчлөлт оруулан үндэсний эв нэгдлээ дээшлүүлэх ёстой гэж залуучуудын бүлгээс ярилцаж байгаа гэлээ. Тэрбээр “МАН-ын шинэчлэлийн асуудал 2011 оны сүүлээс эхэлсэн ч энэ нь нилээдгүй цаг хугацаа шаардсан ажил. Намын шинэчлэл гэдэг тухайн намын хэрэг мэт харагдавч улс орны хөгжлийн асуудал байдаг. Шинэчлэл гээд хэн нэгнийг хольж солих асуудал биш харин тухайн намын бодлого бүхэлдээ өөрчлөгдөх явдал юм” гэв. МАН-ын Залуучуудын бүлгэмийн тэргүүн н.Батсайхан “Манай намын гишүүд “Эв нэгдлийн хороо байгуулсан. Энэ хороо зөвхөн МАН-ын шинэчлэл болон цаашдын дотоод ардчилалын талаар ярилцсан. Улмаар залуу эрдэмтэн судлаачид намынхаа 2252 гишүүнээс судалгаа авч,  МАН-ын гишүүд дэмжигчдын бодол санааг мэдэхийг хүссэн. Судалгааны дүнд намын удирдлагууд гишүүдийнхээ үгийг сонсож, хүлээн авахдаа хойрго байна гэсэн дүгнэлт гарсан. Нийт оролцогчдын 78.3 хувь нь намын шинэчлэл хийх хэрэгтэй хэмээн үзсэн бөгөөд МАН-ын давуу талыг нийгэмд байр сууриа олсон олон гишүүд удирдлагатай гэж үзсэн. Харин сул тал нь авилга хээл хахуульд өртсөн удирдлагуудтай, мөн дараалсан сонгуульд хангалтгүй үр дүн үзүүлсэн. Тиймээс миний хүссэн шинэчлэлийг хийвэл Монгол ардын намаа дэмжихэд бэлэн гэдгээ судалгаанд оролцогчдын 63.3 хувь мэдэгдсэн. Тиймээс МАН-ын 27 дугаар Их хурлыг ойрын хугацаанд зайлшгүй хийх шаардлагатай байна. Энэхүү хурлыг намын жирийн гишшд дэмжигчид, хэвлэл мэдээллийнхэнд нээлттэй байлгах үүднээс МАН-ын дарга Ө.Энхтүвшинд уриалга хүргүүлж байна” гэлээ. Тус уриалгад намын гишүүдийн оролцоог нэмэгдүүлэх , санхүүжилтийг ил тод байлгах, Монгол улсын хөгжлийн төлөө бодлого, зорилгоо ил тод байлгах, МАН-аас жагсаалтаар УИХ-д сонгогдсон гишүүдийн ажилд дүгнэлт хийж, шаардлагатай гэвэл эргүүлэн татах зэрэг асуудлыг энэ сарын 21-ний дотор Удирдах зөвлөлийн хурлаар хэлэлцүүлэх шаардлагатай. Мөн энэхүү уриалгын хариуг энэ сарын 18-ний дотор хариулт өгөхийг сануулсан аж. Мөн энэ үеэр МАН-ын Удирдах зөвлөлийн гишүүн Р.Рааш “Нэр нь ондоо болсон ч нэг үндэс суурьтай МАХН-тай нэгдэх асуудлыг хоёр намын ахмад гишүүд ярилцаж байгаа. Тэгээд ч МАХН-ын дарга өмнө нь манай намын дарга хийж явсан. Түүний хувьд намын хуучин нэрийг сэргээсэн нь буруу биш боловч цаг хугацааг буруу тооцоолж, гишүүдийнхээ итгэл үнэмшлийг өдөөж чадаагүй нь улс төрийн алдаа байсан. Тиймээс салсан намаа нийлүүлж, сарнисан бодлогоо нэгтгэх цаг нь болсон гэж үзэж байгаа.  Түүнчлэн өчигдөр намын Удирдах зөвлөлийн хурлаар Ерөнхийлөгчид нэр дэвших хүн хэн байх талаар ярилцсан. Гэхдээ олны саналаар дэмжигдсэн хүнийг сонгох нь зүйтэй гэж үзсэн. Манай намыг лидергүй, нэр дэвших хүнгүй гэсэн мэдээлэл гарч байна. Энэ бол буруу. Гагцхүү зөв хүнийг гаргах нь чухал” хэмээн өгүүлсэн юм. П.Наран