Баян-Өлгий аймгийн иргэн Б.Аманжол хүүхдүүдийнх нь эрх зөрчигдөж байгаа талаар өнөөдөр олон нийтэд хандлаа. Тус аймгийн VIII цэцэрлэгийн багш К.Ботагөз, туслах багш Х.Нургүл нарын хариуцлагагүй үйлдлээс болж хүүхдүүд нь удаа дараа бэртэж, гэмтсэн байна. Тодруулбал, Б.Аманжолын бага хүү А.Тасхын нь өнгөрсөн оны гуравдугаар сард цэцэрлэгээс ирэхдээ хацар, духандаа гэмтэл авчээ. Энэ үед цэцэрлэгийн багш нар уучлалт гуйгаад өнгөрсөн байна. Харин оны эхэнд том охин нь цэцэрлэгтээ явахаас айдаг болсон байна.
Учир нь багш нар нь айлгаж дарамталдаг гэжээ. Аав Б.Аманжол нь энэ талаар VIII цэцэрлэгт дахин хандахад түүнийг гомдол гаргалаа хэмээн цагдаагийн байгууллагад өгч шалгуулсан байна. Тэрээр хүүхдийнхээ эрхийг хамгаалах шаардлага тавьсныхаа төлөө цагдаагийнханд шалгуулсандаа гомдолтой байгаа хэллээ. Түүнчлэн энэ талаар аймгийн хуулийн байгууллага, Хүүхдийн төлөө хэлтэст удаа дараа хандсан ч дөрвөн сарын турш гомдлын хариугаа авч чадахгүй яваа аж. Аймгийн Хүүхдийн төлөө хэлстийнхэн "Танай хүүхэд гэмтэл авснаас биш хүүхдийн эрх нь зөрчигдсөн зүйл алга” гэж хэлжээ. Тэр битгий хэл багш нар түүнийг “Та яваад заргалд. Хаа хүрэхийг чинь харъя. Манай хүргэн ах аймгийн Засаг даргын орлогч болсон. Тиймээс чи намайг яаж ч чадахгүй” гэх мэтээр хохирсон иргэнийг нэмээд дарамталдаг аж. Иргэн Б.Аманжол “Тийм увайгүй, багш нэр зүүсэн хүмүүсийн гарт хүүхдүүдээ даатгахаас айж байна” хэмээн хэлсэн. Тэрээр нийслэлд ирээд Хүүхдийн төлөө үндэсний төвд хандаад 10 гаруй хонож буй ч дорвитой хариуг авч чадаагүй байгаа аж.
Д.Цэцэг