УИХ-ын сонгуулийн 26 дугаар тойрогт нэр дэвшин, ялалт байгуулсан Д.Сумъябазарыг УИХ-ын гишүүний тангараг өргүүлэх асуудлыг өнгөрсөн долоо хоногт хэлэлцсэн. Энэ үеэр УИХ дахь Ардчилсан намын бүлгийн дарга Д.Эрдэнэбат “Дахин сонгууль одоо хэрэгжиж байгаа хуулийг зөрчсөн гэж үзсэн байр суурь дээр АН-ын бүлэг одоо хүртэл хэвээр байгаа. Сонгуулийн тойргийн хорооны шийдвэрийг хууль зөрчсөн эсэх талаар Үндсэн хуулийн Цэцэд ч гомдол гаргасан. Харин Цэцийн шийдвэр бидний хэнийх нь зөв болохыг нотолсны дараа энэ асуудлыг ярина” гэсэн юм.
Тэгвэл Үндсэн хуулийн Цэцийн шийдвэр гарчээ. Энэ талаар УИХ-ын гишүүн Ё.Отгонбаяр өөрийн твиттер хуудаснаа “Сумъяабазарын талд Үндсэн хуулийн Цэцийн шийдвэр гарчээ. Одоо тангараг өргөхөд саад алга боллоо” хэмээн бичжээ.
Харин АН-ын бүлгийн зүгээс Д.Сумъяабазарыг тангараг өргүүлнэ гэх асуудал нь Өвөрхангайн тойргоос сонгогдох болзлоо хангасан Д.Зоригтын асуудалтай адил, тиймээс тангараг өргүүлэх бол хамтад нь өргүүлэх шаардлагатай гэж үзэж байгаа аж.
Б.Аянга