Нийслэлийн Засаг дарга Э.Бат-Үүлтэй биечлэн уулзах хүсэлтэй 154 иргэний тавьсан санал, хүсэлтийг мэргэжлийн байгууллагуудын оролцоотойгоор шийдвэрлэн хариу өглөө хэмээн Иргэд хүлэн авах төвөөс мэдээллэж байна. Нийслэлийн Засаг даргын салбар хариуцсан орлогч нараар ахлуулсан 6 ажлын хэсэг өнгөрсөн сарын 31-нээс энэ сарын 08-ны өдрүүдэд Баянгол, Баянзүрх, Сүхбаатар, Сонгинохайрхан, Чингэлтэй, Хан-Уул дүүргийн Засаг даргын Тамгын газарт тус тус ажиллаж, иргэдтэй уулзжээ. Уулзалтад оролцсон иргэдийн саналыг авч үзвэл 33.1 хувь нь буюу 3 хүн тутмын 1 нь хүнд хэцүү нөхцөлд амьдарч байгаагаа хэлж, орон сууц олгохыг хүсчээ.
Түүнчлэн өмнө нь хураалгасан байрны оронд шинэ орон сууц авах, ахмадын орон сууцны хөтөлбөрт хамрагдах хүсэлтэй иргэд цөөнгүй байжээ. Мөн иргэдийн 25.3 хувь буюу 4 хүн тутмын 1 нь газар авах хүсэлт болон газар өмчлөх, эзэмших, ашиглах эрхтэй холбоотой, газрын хэмжээ, давхардлаас үүссэн зөрчил, маргаантай асуудлаар хандсан байна.
Хотын даргатай биечлэн уулзах хүсэлтүүдийн ихэнх нь хариуцаж буй салбарын хүрээнд шийдвэрлэгдэх бүрэн боломжтой асуудлууд байсан юм. Тиймээс цаашид энэ асуудлыг нийслэлийн нутгийн захиргааны салбар хариуцсан байгууллага, нэгжүүд шуурхай шийдвэрлэж, эцэслэн хариу өгөх тогтолцоонд шилжихээр болсон юм.
Д.Цэцэг