Чингэлтэй дүүргийн 4-р хорооны нутаг дэвсгэрт байрлах “Толла” хүнсний дэлгүүрт энэ сарын 18-ны лхагва гаригийн орой зэвсэглэж, баг өмссөн этгээд халдан, хоёр ч удаа хий буудаж орлогынх нь мөнгийг дээрэмдэхийг завдсан хэрэг гарсан.
Уг хэргийг 33 настай, цагдаагийн ахмад цолтой Ч.Эрдэнэжаргал гэгч үйлдсэн нь олныг цочирдуулсан. Өнгөрсөн сараас эхлэн ийм төрлийн зэвсэгт дээрэм хэдэнтээ гарсан бөгөөд цагдаагийнхан хорихоос өөр төрлийн болон хорих ял эдэлж байгаа гадуур ажил хийж буй хүмүүжигч нарыг хэрэгт холбогдуулан шалгаж, цагдан хорьж байсан аж. Гэтэл гэмт хэрэг илрүүлэх, иргэдийн амар тайван амьдралын төлөө хэмээн тангараг өргөсөн цагдаагийн алба хаагч энэ хэргийг үйлдэж байсан нь нэгэнтээ ил болоод байгаа. Ч.Эрдэнэжаргал нь ЦЕГ-ын харьяа Эрүүгийн цагдаагийн газрын Эдийн засгийн хэлстийн эдийн засгийн төлөөлөгч, цагдаагийн ахмад цолтой юм.
Тэрбээр өнгөрсөн наймдугаар сарын 02-ны 21.40 цагийн орчимд “Толла” хүнсний дэлгүүрт орж, нэг удаа хий буудаж худалдагчийг айлган сүрдүүлж орлогын 440 мянган төгрөгийг дээрэмдсэн. Түүнчлэн наймдугаар сарын 27-ны өдөр дахин 22 цагийн орчимд Чингэлтэй дүүргийн 4-р хорооны нутаг дэвсгэрт үйл ажиллагаа явуулдаг “Миний дөт” хүнсний дэлгүүрт хийн буу ашиглан 2 удаа буудаж дээрэм хийхийг завджээ. Улмаар энэ сарын 09-ны өдөр мөн л “Толла” дэлгүүрээс 606.300 төгрөг дээрэмдсэн. Харин энэ сарын 18-ны өдөр 21.30 цагийн үед тус дэлгүүрт дахин дээрэм хийхээр ороод газар дээрээ баригдсан энэ.
Цагдаагийн ажилтан Ч.Эрдэнэжаргалын үйлдсэн хэргүүдэд “Толла” болон “Миний дөт” дэлгүүрийн камерийн бичлэг, хэргийн газар дээрээс эд мөрийн баримтаар хураагдсан 9 мм-ийн хонгио, сум, хийн буу мөн гэр хохирогч нарын мэдүүлгээр нотлогдож байгаа бөгөөд одоо хэргийг үргэлжлүүлэн шалгаж байгаа юм.
Ч.Эрдэнэжаргал нь 1980 оны есдүгээр сарын 18-ны өдөр Сэлэнгэ аймгийн Зүүнхараа хотод төрсөн нэгэн. Бага, дунд сургуулиа онц дүнтэй дүүргээд ОХУ-ын Москва хотод хууль эрхзүйн чиглэлээр сурч 2007 онд төгсөөд Эрүүгийн Цагдаагийн газрын Эдийн засагтай тэмцэх тасгийн төлөөлөгчөөр ажилд оржээ.
Түүний аав нь Зүүнхараа хотын цагдаагийн газарт ажиллаж байгаад тэтгэвэрт гарсан бол өвөө нь ч мөн цагдаагийн хурандаа цолтой рүн байсан байна.
Д.Цэцэг