“Үл таних этгээдүүд насанд хүрээгүй охинд тариа хийхийг оролджээ” гэсэн мэдээлэл  зарим сонин хэвлэлээр цацагдсан юм.  Уг мэдээллийн мөрөөр  Улсын Ерөнхий Прокурорын газраас Сонгинохайрхан дүүргийн прокурорын газарт  шалгах тухай үүрэг өгсөн байна. Хэргийн талаар тодруулбал Сонгинохайрхан дүүргийн  нэгдүгээр хорооны нутаг дэвсгэрт  өнгөрөгч арваннэгдүгээр сарын 15-ны Г.Отгонзулд үл таних этгээдүүд тариа хийсэн гэсэн гомдол тус дүүргийн цагдаагийн хэлтэст ирсэн байна. Эл гомдлын мөрөөр цагдаагийн ажилтнууд хэргийн газарт үзлэгээр хохирогч охины гэрээс Неровекс гэсэн бичиг бүхий эм хэрэглэх заавар, Неробекс, Ципринол гэсэн бичигтэй эм, Метронизадол гэсэн бичигтэй тарианы хайрцаг, бортгон шил, систем, 3 граммын 1 ширхэг хэрэглэсэн, 6 граммын 3 ширхэг хэрэглэсэн тариур, Ампицилин гэсэн бичигтэй тарианы 3 ширхэг шил, цус мэт цэгэн толбоор бохирлогдсон хөвөн новкайны 3 ширхэг хоосон шил, аспирин 100 гэсэн бичигтэй эмнүүд, Г. Отгонзулын хэрэглэж байсан гэх I Рhone маркын гар утас, INQ маркын гар утас зэргийг цагдаанийн ажилтнууд  хураан авчээ. Эдгээр хурааж авсан тариа, тариур, цус мэт цэгэн толбоор бохирлогдсон хөвөн, эм зэрэг нь бэр эгч Одмаагийн эмчилгээнд хэрэглэгдэж байсан зүйлс болох нь тогтоогдсон  байна. Г.Отгонзул нь 2011 оны 11 дүгээр сарын 13-ны өдөр Сонгинохайрхан дүүргийн 1-р хорооны нутаг дэвсгэр Толгойтын 128-47 тоотод байрлах гэртээ аав, ээж нарын хамт байхад нь гаднаас Зулаа гэж дуудахад нь гарахад үл таних 2 залуу түүний үерхдэг найз болох Баярсайханы ах байна уулзая гэж дагуулж явжээ. Гэрээс нь баруун хойш байрлах гудамжинд аваачиж заналхийлэн улаан өнгийн шингэн зүйл хийсэн тариур гаргаж баруун булчин тус газарт нь тарьж, айлган сүрдүүлсэн гэж тэрээр мэдүүлжээ. Г.Отгонзулыг ар гэрийнхэн нь яаралтай түргэн тусламжийн 103-аар 2011 оны 11 дүгээр сарын 13-ны өдрийн 18 цаг 25 минутанд Сонгинохайрхан дүүргийн Эрүүл мэндийн төвд хүргэж эмнэлэгийн анхны үзлэгт оруулсан байна. Гэвч үзлэгээр Г.Отгонзулын биед ямар нэг ил харагдах шарх гэмтэлгүй, баруун гарын булчинд тариа тариулсан гэх боловч уг газарт тариурын зүүны ором байхгүй байсан бөгөөд энэ талаар анх үзлэг хийсэн их эмч Г- яаралтай тусламжийн үйлчилгээний хуудсанд тэмдэглэсэн байна. Г.Отгонзулыг мөн өдөр Эх Нялхсын Эрдэм Шинжилгээний үндэсний төвд ар гэрийнхэн нь авч очиж биохимийн шинжилгээ хийлгэж, Наркологийн төв зэрэгт авч очиж үзүүлсэн байна. Одоогийн байдлаар  түүний биед учирсан гэмтэл байгаа эсэх, тариулсан эсэх, ямар нэг бодисын үйлчлэлээр хордсон эсэхийг тодруулахаар Шүүх эмнэлэгийн шинжээч томилон дүгнэлт гаргуулахаар Шүүх шинжилгээний үндэсний хүрээлэнд тогтоол хүргүүлээд байгаа аж. Н.Түвшин