Үндэсний эрх чөлөө, тусгаар тогтнолоо сэргээн мандуулсны 102 жилийн ойд зориулсан Монгол Улсын Ерөнхийлөгчийн цомын төлөөх шилдэг 128 бөхийн барилдаан өчигдөр Монгол бөхийн өргөөнд гуравдахь удаагаа боллоо.

Чансаа өндөр хүчтэнүүдийн барилдаанд Ховд аймгийн Чандмань сумын харьяат Ховд дэвжээ, “Нью прогресс” группийн бөх улсын начин Б.Пүрэвсайхан долоо даван түрүүлж, Ерөнхийлөгчийн нэрэмжит цомыг гардлаа. Харин Сэлэнгэ аймгийн Мандал сумын харьяат Таванхан дэвжээ, Мондэй компани, Ноёд группийн бөх улсын аварга Г.Эрхэмбаяр үзүүрлэсэн юм.

Их шөвгийн дөрөвт Хөвсгөл аймгийн Шинэ-Идэр сумын харьяат Хөвсгөлийн хүчтэн дэвжээ, “Энержи ресурс” компаний бөх улсын арслан Х.Мөнхбаатар, Төв аймгийн Баянхангай сумын харьяат Дүнжингарав дэвжээний бөх улсын заан Б.Батмөнх нар шалгаран үлдсэн.

Өнгөрсөн жилийн барилдаанд Булган аймгийн Бүрэгхангай сумын харьяат, “Булганхангайн хүчтэнүүд” бөхийн дэвжээ, Хилчин спорт хороо, “Жигүүр гранд” группын бөх улсын заан Мөнхсайханы Өсөхбаяр түрүүлж байсан бол анхны барилдаанды түрүү бөхөөр улсын аварга С.Мөнхбат тодорч байсан билээ.

Б.Буд