Баян-Өлгий аймгийн Өлгий сумын харъяат 9 иргэнд энэ сарын 24-ний өдөр халдварт өвчний сэжиг бүхий шинж тэмдэг илэрчээ. Дээрх өвчтнүүдээс дээж авч Халдварт өвчин судлалын үндэсний төвийн лабораторид шинжлүүлэхэд энэ сарын 27-ны өдрийн хариугаар А /34 настай, эмэгтэй/, А/31 настай, эмэгтэй/ , Г/5 сартай, эмэгтэй/, И/4 сартай, эмэгтэй/ нар томуугийн A хүрээний H1N1 вирусийн халдвар авсан болох нь тогтоогдсон тул аймгийн Нэгдсэн эмнэлэгт хэвтэн эмчлүүлж байгаа талаар бид өмнө нь мэдээллэсэн. Тиймээс тус аймгийн Онцгой комиссын 01 дүгээр сарын 28-ны өдрийн хуралдааны шийдвэрийг үндэслэн аймгийн хэмжээнд сургууль, цэцэрлэгийн болон олон нийтийг хамарсан үйл ажиллагаанд 7 хоногийн хугацаатай хязгаарлалт хийжээ.

БНХАУ-д гарсан шувууны томуугаар 10 хүн шинээр өвчилж, нийт онош батлагдсан өвчлөлийн тохиолдол 219, үүнээс нас барсан хүний тоо 55 болжээ. БНХАУ-ын зарим мужид  шувууны томуугийн А вирусын  халдварын хүний өвчлөл бүртгэгдэж,  нэмэгдэх хандлагатай байгаа тул энэ нутагт явах аялалаа түр хойшлуулах, гадаадад явж байгаа иргэд амьд шувууны захаар орохгүй байх,  хоол хүнсээ зөв сонгох,  бүрэн боловсруулж хэрэглэх, гараа сайн угааж, ариун цэврийн дэглэм сахихыг зөвлөж байна.

Д.Цэцэг